Тыктокер-сірата Даня Мілохін праспяваў гімн Украіны і стаў новай ахвярай расійскай прапаганды
Прапагандысты і «патрыёты» назвалі яго «здраднікам» і прапанавалі пазбавіць грамадзянства Расіі.
Тыктокер Даня Мілохін, які месяц таму зʼехаў у ЗША, праспяваў гімн Украіны падчас стрыму з украінскім блогерам Артурам Бабічам, піша «Медуза». Спачатку Мілохін пачаў выконваць гімн Расіі, гэта выклікала незадаволенасць Бабіча. «А што не так, я спяваў гімн сваёй краіны», — сказаў яму Мілохін, пасля чаго пагадзіўся разам праспяваць гімн Украіны.
Увагу да стрыму прыцягнула прапагандыстка Вольга Скабеева. «Будзем лічыць, што спаліў масты», — заявіла яна, выказаўшы надзею, што тыктокер «больш не стане ў Расіі тварам хаця б Сбербанка». Пасля гэтага Мілохіна пачалі актыўна крытыкаваць, яго называлі «здраднікам» і прапаноўвалі больш «не пускаць у Расію». Многія прапагандысцкія СМІ прысвяцілі Мілохіну крытычныя матэрыялы.
Мілохіна публічна асудзіла трэнер па фігурным катанні Таццяна Тарасава, якая разам працавала з ім на шоу «Ледніковы перыяд». «Людзі, якія спяваюць гімн Украіны, павінны жыць ва Украіне!» — заявіла яна.
Дэпутат Дзярждумы Аляксандр Хінштэйн заявіў, што яму шкада, што Мілохін «так ганебна распараджаецца сваім лёсам».
Сенатар ад Крыма Сяргей Цэкаў выказаў здагадку, што Мілохін можа быць «нашчадкам здрадніка», і заклікаў пазбавіць яго ўсіх рэкламных кантрактаў.
Акцёр і тэлевядучы Аскар Кучэра назваў Мілохіна «поскуддзю».
Актывіст Віталь Барадзін, вядомы сваімі даносамі на незалежныя СМІ, папрасіў Генпракуратуру абʼявіць Мілохіна «замежным агентам» і пазбавіць яго расійскага грамадзянства.
Мілохін у адказ на абвінавачванні ў ягоны адрас выказаў здзіўленне, нагадаўшы, што расійскі гімн ён таксама спяваў: «У мяне пытанне, вось людзі выразалі, як я спяваю гімн Украіны. Чаму людзі не выразалі, як я спяваў гімн Расіі да гэтага».
Рэкламнае агенцтва WildJam, з якім супрацоўнічае Даня Мілохін, заявіла «Медузе», што «нічога не каментуе».
Мілохін зʼехаў з Расіі ў канцы кастрычніка, нечакана абвясціўшы, што спыняе свой удзел у шоу «Ледніковы перыяд». Прычыну адʼезду ён не называў. Пры гэтым тыктокер падкрэсліваў, што пра эміграцыю ў ягоным выпадку гаворка не ідзе.
Наўпрост Мілохін не выказваў свайго стаўлення да вайны ва Украіне. Праз два дні пасля пачатку расійскага ўварвання ён заклікаў сваіх прыхільнікаў «не шукаць вінаватых» і «не патрабаваць прымальных рэакцый».
«Цяпер няма тых, хто выйграў і прайграў. Мы ўсе пацярпелыя. Усе! І кожны спраўляецца з шокам па-свойму — нехта дзейнічае, нехта замёр, нехта плача, нехта нясе ахінею, нехта супакойвае і абдымае. Пачніце з сябе! Паглядзіце — вы зараз выйшлі на сцежку вайны або на сцежку міру», — напісаў тыктокер.
У студзені 2022 года, за паўтара месяца да пачатку вайны, Мілохіна не пусцілі ва Украіну. «Я вораг», — пракаментаваў ён такое рашэнне.
Даніла Мілохін нарадзіўся ў Арэнбургу. Дзяцінства ў хлопчыка было няпростым: бацька пакутаваў на алкагалізм, яны з маці развяліся, у тры гады Даніла разам са сваім старэйшым братам апынуўся ў дзіцячым доме. Дзякуючы папулярнасці ў тыктоку Мілохін стаў зоркай.
Цяпер чытаюць
Таксістка з Таджыкістана насмерць збіла беларуску ў Польшчы — і спакойна пакінула краіну24
Каментары