Рэсурсы, куды вы заходзіце штодзень, могуць стаць каштоўнай дапамогай на шляху да беларусізацыі. Расказваем, як перавесці на родную мову тэлеграм, фэйсбук і іншыя сацсеткі і месенджары.
Тэлеграм
Калі хочаце змяніць мову ў мабільным дадатку тэлеграма, адкрыйце «Налады». Вам трэба «Мова», яна ў канцы спісу. Далей націскайце на пункт «Беларуская». Гэткім жа чынам змяняем мову і ў версіі месенджара для камп’ютара.
Ёсць і больш просты спосаб пераключыць месенджар на беларускую мову — дастаткова перайсці па гэтай спасылцы: t.me/setlanguage/be.
Вайбер
У выпадку з мабільным дадаткам змяніць мову можна амаль гэтак жа, як у мінулым месенджары. На галоўнай старонцы націсніце на тры кропкі, што ў правым ніжнім куце, і выберыце пункт «Налады». У новым меню клікніце на пункт «Агульныя» (General). Знайдзіце пункт «Мова» і выберыце беларускую.
У камп’ютарнай версіі вайбера ўсё прасцей. У верхнім меню знайдзіце пункт «Налады» і клікніце па радку «Уліковы запіс». Выбірайце пункт «Змяніць мову» і шукайце ў спісе беларускую.
«Укантакце»
Калі вы выкарыстоўваеце вэб-версію сэрвісу, адкрыйце сваю старонку і націсніце на верхнюю кнопку з вашым аватарам. У меню, што адкрыецца, выберыце пункт «Налады» і раздзел «Акаўнт і знешні выгляд», пракруціце яго да нізу і ў пункце «Мова» выберыце беларускую (можна нават спыніцца на тарашкевіцы).
У выпадку з мабільнай версіяй працэс будзе выглядаць трохі па-іншаму. Вам трэба адкрыць галоўную старонку рэсурсу m.vk.com, потым націснуць на значок у выглядзе трох палосак у правым ніжнім куце. Адкрыецца ўкладка «Меню», у якой вам трэба будзе знайсці значок-шасцярню ў правым верхнім куце старонкі. Так вы трапіце ў «Налады». Потым пераходзьце ў раздзел «Акаўнт», пасля чаго — у блок «Рэгіянальныя налады». Нарэшце, там выберыце беларускую мову для свайго профілю і націсніце ў канцы на кнопку «Захаваць».
Тыя, хто карыстаецца сацсеткай праз дадатак, на жаль, пакуль не могуць перавесці яго на беларускую мову.
Фэйсбук
У выпадку з вэб-версіяй сацсеткі змяняем мову падобным чынам, як і «Укантакце». Націсніце на свой аватар у правым верхнім куце і ў меню, што адкрылася, выберыце пункт «Налады і прыватнасць», у новым меню націсніце на пункт «Мова» — ён будзе апошнім. У графе «Мова Facebook» націсніце «Змяніць», выберыце беларускую і захавайце змены.
Што да мабільнай версіі фэйсбука, націсніце на значок, што выглядае як тры палоскі, у правым верхнім куце. У меню, што адкрыецца, трэба выбраць пункт «Налады і прыватнасць» і націснуць на яго — пад ім адкрыецца графа «Мова». У гэтым раздзеле выберыце беларускую мову.
Калі ў вас фэйсбук працуе праз дадатак і вы маеце тэлефон на платформе Android, робім наступным чынам. Як і ў мінулым абзацы, адкрыйце меню «Налады і прыватнасць», потым выберыце пункт «Налады». У новым меню націсніце на «Мова і рэгіён», выберыце пункт «Мова для кнопак, загалоўкаў і іншага тэксту на Facebook», знайдзіце ў спісе беларускую мову і націсніце на яе.
Што рабіць, калі ў вас дадатак для iPhone? Трэба вырашаць пытанне праз гаджэт, на якім у вас ўсталяваны дадатак, бо фэйсбук аўтаматычна выкарыстоўвае мову, зададзеную на iPhone.
«Аднакласнікі»
У дэсктопнай версіі сацсеткі змяніць мову вельмі проста. На галоўнай старонцы вашага профілю знайдзіце пункт «Мова» ў правым верхнім куце, клікніце па ім і выберыце ў спісе беларускую мову.
Калі вы карыстаецеся сацсеткай праз мабільны дадатак і жадаеце перайсці на беларускую, націсніце ў меню на кнопку «Налады» (яна можа быць прадстаўленая ў выглядзе шасцярні ў правым верхнім куце) і выберыце «Налады профілю». Далей выбіраем пункт «Змяніць мову» і ўжо там знаходзім у спісе беларускую мову.
Хочаце беларусізаваць інстаграм, твітар, ватсап ды скайп? Вымушаныя вас расчараваць: на гэтых рэсурсах белмоўны інтэрфейс пакуль што не даступны.
«Наша Нiва» — бастыён беларушчыны
ПАДТРЫМАЦЬШто за новая сацсетка, якой цікавяцца беларусы?
Стваральнік твітара аб'явіў пра стварэнне новай сацыяльнай сеткі
Розыгрышы ў Instagram — ашуканства ці рэальная магчымасць атрымаць круты прыз і развіць свой акаўнт?
На вайне ва Украіне загінуў былы дырэктар двух аршанскіх заводаў4
Каментары