Легенду англійскага футбола адхілілі ад тэлеэфіру з-за крытыкі ўрада. На знак пратэсту іншыя вядоўцы пачалі зрываць праграмы, гендырэктару BBC давялося выбачацца
Былы футбаліст зборнай Англіі Гары Лінэкер выступіў супраць законапраекта аб нелегальных мігрантах у Брытаніі, параўнаўшы ў сацсетках рыторыку ўрада з наратывамі ў Германіі 30-х гадоў. Тэлекампанія BBC адхіліла яго ад працы вядоўцам праграмы Match of the Day.
«Мы ніколі не казалі, што Гары павінен устрымлівацца ад выказвання ўласнага меркавання, але мы казалі, што ён павінен устрымлівацца ад таго, каб уставаць на той ці іншы бок па пытаннях, якія тычацца палітычных партый, або ў рэзанансных палітычных спрэчках», — растлумачыла сваё рашэнне кіраўніцтва тэлекампаніі.
У падтрымку Лінэкера выступілі многія каментатары і журналісты, у выніку чаго суботні выпуск праграмы Match of the Day, які звычайна доўжыцца больш за гадзіну, быў скарочаны да 20 хвілін.
Апроч гэтага, з-за байкоту журналістаў і вядучых быў сарваны выхад праграм Football Focus, Final Score і радыёшоу Fighting Talk.
Генеральны дырэктар BBC Цім Дэйві прынёс прабачэнні за зрыў спартыўнай праграмы.
«Для мяне будзе поспехам вярнуць Гары ў эфір і разам прадставіць гледачам асвятленне спорту сусветнага ўзроўню», — сказаў Дэйві, прызнаўшы, што мінулы дзень быў «цяжкім» для BBC. Ён таксама дадаў, што карпарацыя «вельмі старанна працуе над тым, каб вырашыць сітуацыю».
Цяпер чытаюць
У Гомелі за палітыку асудзілі кіраўніка аб'яднання, якое шукае парэшткі ахвяраў вайны і сталінскіх рэпрэсій, і яго жонку-медсястру8
Каментары