Зменшылі цэны на беларускія малочныя прадукты, якія пастаўляюцца за мяжу. Прытым даволі значна
Міністэрства сельскай гаспадаркі і харчавання прыняло пастанову, якой прыкметна зменшыла гранічныя мінімальныя цэны на некаторую малочную прадукцыю, якая рэалізуецца па знешнегандлёвых дамовах.
Згодна з дакументам, экспартная цана на згушчанае малако і вяршкі тлустасцю да 1,5% апусцілася на 10—13% пры пастаўках у Расію ды іншыя дзяржавы ЕАЭС, СНД і ў Грузію, а таксама адразу на 26% пры адпраўцы ў астатнія краіны.
Для аналагічных тавараў тлустасцю звыш 1,5% мінімальныя экспартныя цэны таксама паменшалі: для Расіі — на 8%, для ЕАЭС — на 15,5%, для СНД і Грузіі — на 9,5%, для іншых краін — на 12,5%.
Расцэнкі на сметанковае масла тлустасцю больш за 80% зменшыліся пры пастаўках у Расію на 4,4%, у дзяржавы ЕАЭС, СНД і ў Грузію — на 13%, у Ізраіль — на 1,6%, у астатнія краіны — на 10%.
Экспартныя цэны на сметанковае масла тлустасцю 72—80% зрэзалі наступным чынам: пры пастаўках у Расію — на 5%, у дзяржавы ЕАЭС, СНД і ў Грузію — на 14%.
Сыры тлустасцю да 45% патаннелі пры пастаўках у Расію на 7,2%, у дзяржавы ЕАЭС, СНД і ў Грузію — на 8,2%, у астатнія краіны (акрамя Сербіі і Егіпта) — на 6,6%.
Пры тлустасці прадукцыі звыш 45% цана на пастаўкі ў Расію, ЕАЭС, СНД і ў Грузію зменшылася на 8,1%, у астатнія краіны (таксама за выключэннем Сербіі і Егіпта) — на 7,4%.
Пастанова ўступае ў сілу 12 красавіка.
У спіс экспартаваных тавараў, на якія Мінсельгасхарч Беларусі з чэрвеня 2022 года вызначае гранічныя мінімальныя цэны, уваходзяць розныя віды малочнай прадукцыі, а таксама ялавічына.
«Для беларускіх уладаў я, хутчэй, магчымасць, а не пагроза». Калеснікава дала вялікае інтэрв’ю Золатавай92
Каментары