У Гомелі неўзабаве пройдуць першынство і чэмпіянат Еўропы па кіданні нажа. Спаборніцтвы па гэтым экзатычным відзе спорту будуць праходзіць з 23 па 25 чэрвеня ў лёгкаатлетычным манежы «Дынама», паведамляе гарадское выданне «Белка».
Удзел у мерапрыемстве пацвердзілі спартсмены з пяці краін: Беларусі, Венгрыі, Грэцыі, Расіі і Сербіі. Усяго збярэцца да 70 чалавек, якія будуць кідаць снарады ў мішэні ў сваіх узроставых групах з рознай дыстанцыі. Самаму малодшаму ўдзельніку — 12 гадоў, найстарэйшаму — 72.
Чэмпіянат, як паведамляецца, збіраюцца наведаць і спартыўныя функцыянеры, а цырымоніі адкрыцця і закрыцця спаборніцтваў, узнагароджання пераможцаў «будуць адпавядаць еўрапейскаму ўзроўню».
Кідаюць у мішэнь аматары гэтага віду спорту спецыяльныя нажы, грані якіх адмыслова затупленыя. Нават у міліцыі пацвярджаюць, што гэтыя снарады не халодная зброя, іх можна без абмежаванняў купіць у крамах.
Каментары