На гомельскім Валатаўскім возеры зноў усталявалі фігуру Валатазаўрыка, з якой у мінулым годзе было шмат клопату і смеху. Таму і сёлетняя падзея ўжо абрасла жартамі. Гомельцы спадзяюцца, што ў гэтым годзе плаcтыкава-металічны шасціметровы плезіязаўр нікуды не сплыве і не патоне, піша «Штодзень».
Паводле звестак у дзяржаўных медыя, ідэя стварэння кампазіцыі належала маленькай дзяўчынцы Аліне. Нібыта яна сама патэлефанавала на прамую лінію кіраўніку адміністрацыі Цэнтральнага раёна і расказала пра тое, што нядаўна паглядзела фільм «Мой хатні дыназаўр» пра прыгоды хлопчыка Ангуса, які жыў на беразе возера Лох-Нес, і захацела такога ж на радзіме.
Уладам ідэя спадабалася, і яны аддалі яе практычнае ўвасабленне ў рукі прыватнай фірмы, якая і ўзяла на сябе фінансавыя выдаткі. У выніку скульптуру зрабілі з металічнага каркаса, на які пластамі нанеслі адмысловы пластык. Зрабілі гэта з мэтай прадухілення з’яўлення ржы ды акіслення ў вадзе, а самая цяжкая частка, галава, была створаная з элементамі бетону.
Па баках ад істоты размясцілі вялізныя бакі, якія павінны былі выконваць ролю паплаўкоў, якія б не дазвалялі аб’екту перакуліцца. А каб канструкцыя нікуды не сплыла, да дна возера яе «надзейна» прымацавалі ланцугамі.
Але ў рэальнасці Валатазаўрык пайшоў на дно амаль адразу пасля ўсталявання, умомант стаўшы мемам.
На зіму Валатазаўрыка з возера прыбралі. І вось днямі ён зноў з’явіўся на Валатаўскім возеры. Цяпер жыхары раёна ды і ўсяго горада робяць ледзь не стаўкі з нагоды таго, якія яшчэ прыгоды чакаюць вядомага ў горадзе плезіязаўра гэтым летам.
Цяпер чытаюць
Аляксандр Лукашэнка так ляснуўся на лёд на хакеі, што трыбуны замерлі ВІДЭА116
Аляксандр Лукашэнка так ляснуўся на лёд на хакеі, што трыбуны замерлі ВІДЭА
«Па-беларуску «Слана» Філіпенкі набывалі больш ахвотна, чым па-руску». Якія кнігі сёння ў топе? Інтэрв'ю з кіраўніцай выдавецтва Gutenberg Publisher55
Каментары