Жаір Балсанару вітаецца з прыхільнікамі. Фота: Myke Sena / Getty Images
Жаір Балсанару абвінавачваецца ў злоўжыванні прэзідэнцкай уладай у выглядзе распаўсюду лжывых сцвярджэнняў, а менавіта ў тым, што ў мінулым ліпені, перад прэзідэнцкімі выбарамі, ён сабраў замежных паслоў і заявіў ім, што электронныя машыны для галасавання, якія прымяняюцца ў Бразіліі, уразлівыя перад хакерамі, і таму яго праціўнікі могуць падтасаваць вынікі выбараў, як піша Бі-бі-сі.
Выбары прэзідэнта прайшлі ў кастрычніку 2022 года, і Балсанару іх прайграў, зусім трохі саступіўшы ў другім туры леваму ветэрану бразільскай палітыкі Луісу Інасіу «Луле» да Сілве.
Справа, якую разглядае Вярхоўны выбарчы суд, не крымінальная, турма Жаіру Балсанару па ёй не пагражае, але судзейская калегія мае права на восем гадоў забараніць 68-гадоваму экс-прэзідэнту балатавацца на выбарныя пасады.
Адначасова Балсанару — падследны па некалькіх крымінальных справах, працэсы па якіх яшчэ не пачаліся.
Балсанару пасля выбараў і беспарадкаў, якія зладзілі яго прыхільнікі паляцеў у ЗША, у Фларыду, але затым вярнуўся на радзіму.
Ці збіраецца ён вылучацца на прэзідэнцкіх выбарах у 2026 годзе, ён яшчэ не казаў, а толькі паабяцаў дапамагчы Ліберальнай партыі, у якой ён ганаровы старшыня, на мясцовых выбарах у наступным годзе.
Бок абвінавачвання сцвярджае, што выступ Балсанару перад пасламі 18 ліпеня 2022 года быў парушэннем закона аб выбарах. Сам экс-прэзідэнт сцвярджае, што ён толькі тлумачыў замежным дыпламатам, як працуе выбарчая сістэма ў Бразіліі.
Правага папуліста Балсанару часта параўноўвалі з Дональдам Трампам, і паводзіны бразільскага прэзідэнта і ягоных прыхільнікаў пасля пройгрышу на выбарах таксама нагадвалі тое, што адбылося годам раней у ЗША.
Пасля пройгрышу Луле ў другім туры 30 кастрычніка з разрывам усяго ў 1,8% Балсанару адмовіўся наўпрост прызнаваць паразу, хоць і распарадзіўся пачаць падрыхтоўку да перадачы ўлады. Праз два месяцы, перад самай інаўгурацыяй Лулы, ён паляцеў у ЗША.
Прыхільнікі Балсанару адразу пасля выбараў пачалі блакаваць дарогі, а пасля інаўгурацыі Лулы, 8 студзеня, захапілі і разграмілі прэзідэнцкі палац, а таксама будынкі парламента і Вярхоўнага суда.
Паліцыя арыштавала паўтары тысячы ўдзельнікаў гэтых беспарадкаў. Па гэтай справе ідзе следства, і праваахоўныя органы падазраюць Балсанару ў падбухторванні да беспарадкаў.
Працэс, які пачаўся ў чацвер у Вярхоўным выбарчым судзе, — гэта юрыдычна асобная справа, і ў ім калегія з сямі суддзяў простай большасцю павінна будзе вырашыць, ці спрабаваў Балсанару сваім выступам перад пасламі незаконна паўплываць на выбаршчыкаў і ці трэба яму за гэта забараніць балатавацца ў найбліжэйшыя гады.
Сам Балсанару на першым пасяджэнні не прысутнічаў, а ягоны адвакат заявіў, што экс-прэзідэнт мае намер абскардзіць пастанову суда, калі яна будзе не на ягоную карысць.
Зрэшты, як адзначае агенцтва Reuters, цалкам магчыма, што зноў вылучаць Балсанару не захочуць яго ж былыя прыхільнікі.
«Значная частка бразільцаў, падобна, вельмі хоча пакінуць ззаду пякельнае полымя эпохі Балсанару», — піша карэспандэнт агенцтва.
З ягоных слоў, некаторыя з правых палітыкаў, былых саюзнікаў экс-прэзідэнта, цяпер публічна ўскладаюць надзеі на іншыя фігуры на правым флангу.
Чытайце таксама:
Прэзідэнта Бразіліі не пусцілі на футбольны матч, бо ў яго не было прышчэпкі
У Бразіліі вызвалілі занятыя пратэстоўцамі палац прэзідэнта і Кангрэс
