У Гомелі жанчына купіла «Лексус» на даходы ад продажу кропу. Яна так кажа
Падатковыя інспектары Гомельскага раёна звярнулі ўвагу на буйныя пакупкі прадпрымальніцы, якая афіцыйна займаецца продажам аўтазапчастак. Тым не менш куплю дарагіх аўто і кватэры ў Гомелі яна патлумачыла даходамі ад продажу вырашчанага на сваім агародзе ўраджаю, піша «Белка».
Жанчына з 2010 года зарэгістраваная прадпрымальнікам, займаецца продажам запчастак да аўтамабіляў, паказвае нядрэнную выручку, своечасова выплачвае падаткі.
Да гэтага часу прэтэнзій да прадпрымальніцы ў падатковай інспекцыі не было. Але сёлета паступіў зварот аб тым, што ІП пры продажы дэталі не правяла грошы праз касу і не выдала пакупніку чэк. Праверка падаткавікоў паказала, што абʼём набытага для перапродажу тавару не пакрываецца паказанай у дэкларацыі выручкай.
— Аддзел падаткаабкладання даходаў прааналізаваў дзейнасць ІП за апошнія дзесяць гадоў. Устаноўлена, што яе расходы перавысілі даходы больш як на 400 тысяч рублёў, — патлумачылі ў падатковай інспекцыі.
Разам з тым прадпрымальніца купіла «Лексус», двухпакаёвую кватэру ў новабудоўлі Гомеля, маючы ва ўласнасці дом. Як патлумачыла жанчына, грошы на кватэру ёй яшчэ ў 2011 годзе падарыла пажылая маці, якая нібыта адклала з пенсіі 1,5 мільярда недэнамінаваных рублёў (цяпер 150 тысяч — заўв. рэд.). Астатнія 240 тысяч падарыў муж.
— У падатковай не прынялі гэтых тлумачэнняў, тады прадпрымальніца прыпісала сабе даходы ад продажу на рынку кропу, пятрушкі і бульбы, вырашчаных на сваім зямельным участку. Гэты факт таксама праверылі, аднак пацвярджэння не знайшлі, — распавялі падаткавікі.
Патрабаванні падаткавікоў па выплаце падаходнага падатку на суму 113 тысяч рублёў прадпрымальніца абскардзіла ў судзе. Але безвынікова.
Цяпер чытаюць
Дзмітрый Семчанка: Я прыйшоў у пул Лукашэнкі біцца з Расіяй28
Каментары