Вайсковы лагер пад Асіповічамі. Фота: AP Photo / Alexander Zemlianichenko
Жыхары Цэлі пацвердзілі, што вагнераўцы засялілі лагер, разгорнуты ў глыбіні вайсковага гарадка. Яго тэрыторыя агароджаная плотам з калючым дротам наверсе. Наёмнікам адрамантавалі пад’язную дарогу.
Вяскоўцы называюць вагнераўцаў «гасцямі».
Калі высветлілася, што яны асядуць у Цэлі, то мясцовае насельніцтва сталі папярэджваць, што «знаходжанне расіян у Беларусі — таямніца, і расказваць пра іх забаронена».
Некаторыя вяскоўцы былі ў лагеры, калі яго разбудоўвалі. Па іх словах, ён выглядае месцам для часовага перабывання вайскоўцаў.
Так выглядаюць намёты ў лагеры, дзе аселі вагнераўцы. Фота: t.me/news_sirena
«Нам кажуць, што «госці» ненадоўга. Нібы прабудуць да зімы, а потым іх некуды адправяць. Мы і самі спадзяёмся на тое. Узімку жыць у намётах нясоладка, а ў нас жа пакуль не вайна, каб цярпець салдатам такія выпрабаванні. Развітаемся без шкадавання», — кажа жыхар Цэлі.
Цэль — гэта сама вёска і вайсковы гарадок, у якім да 2018 года дыслакавалася 465-я ракетная брыгада з прылеглымі да вайсковай часці дамамі для афіцэраў.
Агульны выгляд вайсковай часці і намётавага лагера ля вёскі Цэль, 30 чэрвеня 2023 года. Фота: «Радыё Свабода»
Вяскоўцы пра наёмнікаў кажуць, што яны падобныя да ваяўнікоў з фільмаў — такія ж брутальныя і пагрозлівыя. Па іх відаць, што «хлопцы з вайны» і да беларускіх вайскоўцаў не падобныя.
«У лагер калона прыехала дні два ці тры таму, — расказвае наступны суразмоўца. — Было тады ў лагеры тлумна. Чуўся рогат і мацюканне. Іх гаворка да нашай не падобная. Інтарэсу ў нас да іх няма. Без патрэбы не ходзім у вайсковы гарадок».
Пра знаходжанне ў Асіповіцкім раёне вагнераўцаў 16 ліпеня паведаміла і асіповіцкая раёнка.
«Прадстаўнікі прыватнай вайсковай кампаніі Яўгена Прыгожына, якая ўдзельнічала ў ваенных дзеяннях ва Украіне на баку Расіі, з'яўляюцца інструктарамі па некаторых вайсковых дысцыплінах для байцоў беларускіх тэрытарыяльных войскаў у лагеры пад Асіповічамі», — даводзілася ў публікацыі.
Наколькі вядома, ідэолагі загадалі мясцовай прэсе дазавана даваць інфармацыю аб тым, чым займаюцца наёмнікі ў Беларусі, каб супакойваць насельніцтва.
Вагнераўцы «перадаюць свой досвед» беларускім вайскоўцам на асіповіцкім палігоне. Ад Цэлі да яго паўтара дзясятка кіламетраў.
«Нашаму спакойнаму жыццю, відаць, прыйшоў канец. Ужо паболела мітусні. Часцей зʼяўляецца ў нас міліцыя, з вайсковага гарадка ўвечары чуецца музыка. Пакуль незразумела, што нас чакае», — разгублена выказваецца жыхарка Цэлі.
Вагнераўцы трэніруюць беларускія падраздзяленні тэрытарыяльных войскаў на асіповіцкім палігоне. Скрын відэа прэс-службы Міністэрства абароны Беларусі
Пра размяшчэнне вагнераўцаў у Асіповіцкім раёне паведаміла 26 чэрвеня расійскае выданне «Вёрстка».
«Наша Ніва» высветліла тады, што меркаваным месцам дыслакацыі наёмнікаў можа стаць вайсковы гарадок у вёсцы Цэль. Мясцовыя жыхары расказалі пра тое, што яго пачалі ўпарадкоўваць.
Пазней зʼявіліся фотаздымкі лагера з трыма сотнямі намётаў, які быў разгорнуты пасля 24 чэрвеня. Адзін намёт разлічаны на 60 чалавек.
7 ліпеня памочнік міністра абароны Беларусі генерал-маёр Леанід Касінскі спрабаваў дэзавуяваць інфармацыю аб размяшчэнні ў Асіповіцкім раёне вагнераўцаў. Ён пераконваў, што канчатковае рашэнне не прынята, а лагер «уладкоўваўся для трэніроўкі як вайскоўцаў, так і прадстаўнікоў цывільнай адміністрацыі ў рамках разгортвання сістэмы тэрытарыяльнай абароны».
11 ліпеня Міністэрства абароны прызнала, што вагнераўцы заселяць лагер.
Днямі расійскія тэлеграм-каналы растыражавалі фота кіраўніка прыватнай вайсковай кампаніі «Вагнер» Яўгена Прыгожына, які нібы начаваў у лагеры наёмнікаў пад Асіповічамі.
На гэты час вядома аб прыбыцці чатырох транспартных калон з вагнераўцамі. Па беларускіх дарогах да месца дыслакацыі яны едуць пад разгорнутымі сваімі і расійскімі сцягамі.
ПВК «Вагнер» у дэмакратычным свеце лічыцца тэрарыстычнай арганізацыяй, якая вядомая ваеннымі злачынствамі ва Украіне. У яе шэрагах ваююць крымінальнікі, якіх завербавалі ў расійскіх турмах. Праславіліся вагнераўцы сваімі злачынствамі і ў іншых краінах, перадусім афрыканскіх.
Вагнераўцы ўжо бывалі ў Беларусі. У 2020 годзе тры дзясяткі баевікоў былі затрыманыя па падазрэнні ў падрыхтоўцы беспарадкаў. Калі пасля выбараў пачаліся пратэсты, іх перадалі Расіі.
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»Глядзіце таксама:
Камандзір «Вагнера»: Мы ўсе ў адпачынку да пачатку жніўня, а пасля едзем у Беларусь
Лукашэнка распавёў, дзе ПВК «Вагнер» і Прыгожын
«Дык ПВК «Вагнер» не існуе! Проста не існуе!» Пуцін распавёў, пра што размаўляў з Прыгожыным
Мяцеж Прыгожына выбівае вялікую частку баяздольных часцей і дэмаралізуе расійскіх вайскоўцаў
