Асабісты кухар былога прэзідэнта ЗША Барака Абамы загінуў у выніку няшчаснага выпадку недалёка ад летняй рэзідэнцыі Абамы ў Масачусетсе.
45-гадовы Тафары Кэмпбэл працаваў шэф-кухарам у Белым доме і застаўся ў сям'і Абамы пасля заканчэння яго прэзідэнцкага тэрміну ў 2016 годзе, піша Бі-бі-сі.
Мужчына знік 23 ліпеня падчас заняткаў падлбордынгам (разнавіднасць сёрфінгу).
Паліцыя пачала пошукі пасля таго, як атрымала паведамленне пра весляра, «які ўвайшоў у ваду, некаторы час спрабаваў утрымацца на паверхні, а затым знік пад вадой». Паводле слоў сведак, на паверхні ён больш не з'явіўся.
Цела мужчыны знайшлі ў панядзелак раніцай у сажалцы горада Эдгартаўна на глыбіні каля 2,5 метра і на адлегласці больш за 30 метраў ад берага.
Праваахоўнікі лічаць, што з Кэмпбэлам здарыўся няшчасны выпадак, аднак улады працягваюць высвятляць усе дэталі трагедыі.
Былога прэзідэнта ЗША і яго жонкі ў момант інцыдэнту дома не было. Пазней яны апублікавалі сумесную заяву ў сувязі са смерцю персанальнага кухара.
«Тафары быў членам нашай сям'і. Калі мы ўпершыню сустрэліся, ён быў таленавітым су-шэфам у Белым доме — творчым чалавекам, які быў цалкам адданы сваёй справе. Пазней мы ўбачылі ў ім цёплага, вясёлага і неверагодна добрага чалавека, які рабіў наша жыццё трохі ярчэйшым», — напісалі Барак Абама і яго жонка Мішэль.
«Вось чаму, калі мы рыхтаваліся пакінуць Белы дом, мы папрасілі Тафары застацца з намі, і ён велікадушна пагадзіўся. З таго часу ён стаў часткай нашага жыцця, і нашы сэрцы разбітыя, бо ён сышоў», — гаворыцца ў заяве мужа і жонкі.
Таксама яны распавялі, што ў Кэмпбэла засталіся жонка і сыны-блізняты.
«Сёння мы далучаемся да ўсіх, хто ведаў і любіў Тафары, асабліва да яго жонкі Шэрыз і іх хлопчыкаў-блізнят Ксаўе і Савіна, і смуткуем з прычыны гібелі сапраўды выдатнага чалавека», — заявілі муж і жонка Абама.
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА3
Каментары
На чарзе кітайскі?