У Расіі распрацавалі жартаўлівую праграму «Данос» і сталі атрымліваць даносы сапраўдныя
Айцішнік, які з'ехаў у Еўропу, стварыў парадыйны інтэрнэт-сэрвіс для расійцаў, што жадаюць настукаць адно на аднаго. Ім скарысталіся пяць тысяч чалавек. Аб праграме «Мой данос», якая задумвалася як жартаўлівая, але аказалася папулярнай і сярод сапраўдных стукачоў, піша «Можем объяснить».
Калі ўбіць у Google play запыт «данос», там будзе спампаваць праграму з вельмі падобным да Дзяржпаслуг РФ лагатыпам «Мой данос». Нягледзячы на тое, што ў апісанні самой праграмы гаворыцца, што яна не мае дачынення да дзяржпаслуг і органаў улады і прызначана для забавы, многія людзі ўспрымаюць яе як сур'ёзную і пачынаюць ёй карыстацца, каб адпомсціць знаёмым, распавёў карэспандэнту «МО» яе распрацоўшчык.
Праграміст Уладзімір (імя зменена з меркаванняў бяспекі) пераехаў пасля пачатку вайны ў адну з еўрапейскіх краін.
Упершыню праграму з той жа назвай (па аналогіі з сайтам «Расданос») Уладзімір стварыў яшчэ ў 2018 годзе, а праз некалькі месяцаў выдаліў — папулярнасцю яна тады не карысталася. У 2019 годзе жартоўнае выданне ІА «Панарама» выпусціла навіну пра праграму «Мой данос». «Перыядычна гэтая навіна мільгала ў СМІ, і я вырашыў зноў зрабіць праграму, ужо паводле апісання ў навіне. Лагатып генерыла нейрасетка», — кажа Уладзімір.
Праграма паўторна была размешчана 15 студзеня 2023 года ў Google play. Тады карэспандэнт «МО» пацікавіўся ў распрацоўшчыка, якая яго мэта і што ён будзе рабіць, калі даносы будуць рэальнымі.
Уладзімір адказаў: «Яны нікуды не пойдуць, няхай пішуць сюды, тут усё і застанецца. Я чытаю, здзіўляюся, часам радуюся, калі пішуць негатыўнае меркаванне пра саму праграму або крытыку ўладаў».
Першапачаткова мэтай стварэння праграмы быў жарт, але як толькі пасыпаліся першыя паведамленні, Уладзімір зразумеў, што даносы прыходзяць не толькі жартоўныя, але і абсалютна рэальныя.
Ён адзначае, што колькасць рэальных даносаў заўсёды павялічваецца, калі з'яўляецца інфанагода ў СМІ — замах, атака беспілотнікаў або мяцеж. «Людзі гугляць, дзе можна паскардзіцца, праз ключавыя словы бачаць маю праграму і, не разбіраючыся, пішуць туды».
Распрацоўшчык спадзяецца, што сваёй праграмай дапаможа людзям, на якіх пішуць данос — магчыма, ён не ператворыцца ў рэальны.
Даносчык ужо выплюхнуў негатыў, не разабраўся, што размясціў данос у жартоўнай праграме і на гэтым мог супакоіцца. «Спадзяюся, што адвёў небяспеку ад чалавека», — кажа Уладзімір.
Амаль праз паўгода пасля запуску праграмы база зваротаў стала вялікай — у траўні ўжо больш за 10 000 чалавек спампавалі праграму і напісалі больш за 5000 даносаў. Толькі з красавіка да чэрвеня распрацоўшчыку паступіла больш за 1300 зваротаў. Большасць даносаў жартоўныя або такія, што асуджаюць стваральнікаў і сам інстытут даносаў.
Але каля 20% даносаў былі напісаны з падрабязным апісаннем правін «парушальнікаў» і ўтрымлівалі асабістыя даныя. Большасць з іх маглі б стаць падставай для ўзбуджэння спраў па артыкулах аб фэйках і дыскрэдытацыі войска.
«Я павінен пазваніць нашаму куратару». Як завозілі мігрантаў у Беларусь — цікавыя дэталі з перахопленых тэлефонных размоў4
Каментары