Гісторыя Аляксандра Лебедзева з Гомеля атрымала працяг — яго пачалі буліць у праўладных колах
Праўладнага актывіста з Гомеля Аляксандра Лебедзева могуць выключыць з пралукашэнкаўскага аб’яднання «Патриоты Беларуси» і Камуністычнай партыі. Аб гэтым «Флагшток» даведаўся ад чалавека, які блізка знаёмы з дзейнасцю аб’яднання.
Тыдзень таму Аляксандра Лебедзева затрымалі за падпіску на экстрэмісцкі рэсурс, але ў ізалятары ён правёў толькі ноч. Пасля гэтага выпадку ў аб’яднанні «Патриоты Беларуси» задумаліся аб выключэнні Аляксандра з арганізацыі.
«Яго выпадак разглядаўся як быццам на камсамольскім сходзе. Ён стаў нязручнай асобай не толькі таму, што адсядзеў за падпіску, а таму, што пра Сашу напісалі апазіцыйныя рэсурсы».
Пакуль Аляксандра не выключылі з аб’яднання. Іншыя актывісты заступіліся за яго.
«Саша ўдзельнічае ва ўсіх мерапрыемствах. Шмат людзей выказаліся ў падтрымку Сашы. Таксама некаторыя абураныя, што «патрыётаў» зараз могуць таксама затрымаць за любую падпіску. Цяпер трэба правяраць усе гэтыя рэсурсы — на што ты падпісаны. А Сашу, дарэчы, затрымалі за падпіску ва «УКантакце».
Таксама стала вядома, што Аляксандра Лебедзева хацелі выключыць і з Камуністычнай партыі. Пра гэта ён паведаміў сваім сябрам з аб’яднання «Патриоты Беларуси».
На сёння з усіх акаўнтаў у розных сацыяльных сетках Аляксандра выдаленыя многія яго ранейшыя допісы. На яго старонцы «УКантакце» знікла інфармацыя аб тым, што ён член Камуністычнай партыі.
«Наш супольны рускі свет». Сястра кіраўніка МЗС Рыжанкова жыве ў Францыі, але пасля пачатку вайны атрымала расійскае грамадзянства7
Каментары