Былы ўкраінска-беларускі футбаліст Арцём Мілеўскі шпіталізаваны, яго стан цяжкі
Экс-гулец зборнай Украіны Аляксандр Аліеў распавёў пра стан свайго сябра і былога беларускага футбаліста Арцёма Мілеўскага.
«Дзякуй богу, яго ўдалося пакласці ў бальніцу. Ён ужо на працягу пяці дзён там. Стан, вядома, вельмі цяжкі, але нічога, дактары змагаюцца», — сказаў ён.
Аліеў выказаў падзяку кіеўскаму «Дынама» і прэзідэнту клуба Ігару Суркісу, якія ўзялі ўсе выдаткі на сябе.
Што менавіта здарылася з Мілеўскім, дакладна невядома. Апошнім часам яго прыхільнікі адзначалі, што 38-гадовы Мілеўскі выглядае не найлепшым чынам.
На яго стан неаднаразова звярталі ўвагу. У пачатку гэтага года ўкраінскі журналіст Сяргей Балотнікаў расказваў: «Я так разумею, што Мілеўскага вельмі псіхалагічна прыбіла вайна. Ён нічога не хоча. Мне падаецца, што ў яго прафесійная дэпрэсія. Ён не можа сябе рэалізаваць у цяперашніх умовах».
У тым жа ключы выказваўся спартыўны каментатар Раман Бебех: «Я з Мілеўскім размаўляў — на яго моцна паўплывала вайна, калі ён убачыў, як бамбяць, як паміраюць людзі. Ён не хоча здымаць кантэнт, лічыць, што [цяпер] гэта не важна. Ён толькі адыходзіў ад завяршэння кар'еры, пачалася вайна — і гэта яшчэ больш яго зацягнула ў дэпрэсіўны стан. На яго ўплывае ўсё: што прылятае з ягонай роднай краіны, што бацькі не разумеюць».
Здаецца, што сітуацыю Арцём топіць у алкаголі — у не самым прывабным выглядзе ён ужо трапляў у некалькі лакальных канфліктаў.
Арцём Мілеўскі нарадзіўся ў Мінску, але ў юнацкім узросце пераехаў у Кіеў і заявіў аб жаданні гуляць за Украіну. Гэта выклікала вялікі скандал і неадназначную рэакцыю ў футбольных колах. Чатырохразовы чэмпіён Украіны, удзельнік чэмпіянату свету па футболе. У канцы кар'еры вярнуўся ў Беларусь, дзе ў складзе брэсцкага «Дынама» выйграў чэмпіянат і кубак краіны.
Лічылася, што футбаліст меў вялікі талент, які не змог рэалізаваць. Ён стаў удзельнікам шматлікіх скандалаў.
Чытайце таксама:
Як цяпер выглядае былы ўкраінска-беларускі футбаліст Арцём Мілеўскі. Заўзятары б'юць трывогу
«Набраў 10-12 кг, апух, заплыў». Былы футбаліст Арцём Мілеўскі пасля пачатку вайны ўпаў у дэпрэсію
Цяпер чытаюць
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў15
Каментары