У Пакістане арыштавалі шайку, якая выразала ў людзей ныркі без іх ведама. Правялі мінімум 328 аперацый
Яны прадавалі ныркі па 120 тысяч даляраў для замежнікаў.
У Пакістане арыштавалі шайку з васьмі чалавек на чале з доктарам, які нелегальна выразаў у людзей ныркі для перасадкі багатым кліентам. Некаторыя донары, як кажуць улады, не давалі згоды на аперацыю, піша Бі-бі-сі.
Кіраўнік урада пакістанскай правінцыі Пенджаб Махсін Накві сказаў у нядзелю на прэс-канферэнцыі, што аперацыі па выдаленні ныркі доктар Фавад Мухтар праводзіў дома, прытым часцяком без згоды пацыентаў-донараў.
Па словах Накві, доктару ў якасці асістэнта пры аперацыях дапамагаў аўтамеханік па прафесіі; ён жа дапамагаў завабіць на аперацыю пацыентаў бальніц.
Такім чынам яны правялі як мінімум 328 аперацый, пры гэтым як мінімум тры донары ў выніку памерлі.
Па даных следства, арыштаваныя прадавалі ныркі па 10 мільёнаў рупій (120 тысяч даляраў) для замежных пацыентаў і па тры міліёны рупій — для пакістанскіх.
Махсін Накві паведаміў, што доктара Мухтара арыштоўвалі ўжо пяць разоў, але ён штораз пры дапамозе карумпаваных паліцэйскіх заставаўся на волі.
Шайка гандляроў ныркамі дзейнічала ў асноўным у 13-мільённым Лахоры, у горадзе Таксіла недалёка ад сталіцы, Ісламабада, а таксама ў пакістанскай частцы Кашміра.
«Нелегальных аперацыйных і трансплантацый значна больш. Гэта — тыя, пра якія мы маем пацверджанне», — сказаў Накві.
Гандаль чалавечымі органамі ў Пакістане быў заканадаўча забаронены ў 2010 годзе. Са спадзевам спыніць масавы продаж органаў за мяжу самімі донарамі, дактарамі і пасярэднікамі, улады ўвялі жорсткія пакаранні — дзесяць гадоў турмы і велізарныя штрафы.
Але гэта не дапамагло: гандаль органамі ў Пакістане з яго бедным насельніцтвам і карумпаванымі праваахоўнымі органамі па-ранейшаму квітнее.
У студзені паліцыя ў Пенджабе накрыла іншую шайку гандляроў органамі і знайшла ў падпольнай аперацыйнай зніклага 14-гадовага хлопчыка з ужо выдаленай ныркай.
У гадавіну смерці Жанны Фрыске Дзмітрый Шэпелеў распавёў, чаму не дазваляе сыну бачыцца з яе сваякамі16
Каментары