Міністэрства гандлю Злучаных Штатаў аб'явіла аб новых абмежаваннях для шэрага графічных працэсараў Nvidia. Цяпер пад забаронаю нават гульнявы працэсар RTX 4090.
Nvidia сутыкнулася з сурʼёзнай праблемай з-за нядаўна ўведзеных ліцэнзійных абмежаванняў з боку міністэрства гандлю ЗША на некаторыя графічныя працэсары і паскаральнікі.
Як адзначаюць эксперты, у адрозненне ад папярэдніх абмежаванняў, арыентаваных на хуткасць злучэння на прыладзе, новыя правілы ліцэнзавання заснаваныя на парозе прадукцыйнасці.
Мінулагоднія абмежаванні забаранілі продаж Nvidia H100, які зʼяўляецца асноўным працэсарам для распрацоўшчыкаў штучнага інтэлекту ў ЗША, такіх як OpenAI. Каб адпавядаць экспартным правілам, Nvidia інвеставала ў распрацоўку індывідуальных прадуктаў на базе архітэктур Ampere і Hopper, створаных на аснове арыгінальных серый A100 і H100. Так былі створаныя злёгку запаволеныя версіі пад назвамі H800 і A800.
Аднак цяпер вытворцы сутыкнуліся з новым наборам правіл, якія забараняюць экспарт і гэтай прадукцыі.
Праблема пагаршаецца тым, што нават гульнявы графічны працэсар RTX 4090 падпадае пад дзеянне гэтых новых правіл, што пацверджана NVIDIA ў заяве, пададзенай у Камісію па каштоўных паперах і біржах (SEC).
Строга кажучы, гэта не забарона толькі для Кітая. З дакумента вынікае, што новыя абмежаванні ўжываюцца да «Кітая і краін групы D1, D4 і D5 (уключаючы, але не абмяжоўваючыся, Саудаўскую Аравію, Абʼяднаныя Арабскія Эміраты і Вʼетнам, але выключаючы Ізраіль)».
Да групы D5 адносяцца Беларусь і Расія, як краіны, дзе ёсць высокая рызыка парушэння правоў чалавека.
Новая пастанова практычна ўводзіць поўную забарону на экспарт любога графічнага працэсара Nvidia. Яна ахоплівае «інтэгральныя мікрасхемы, якія перавышаюць пэўныя парогавыя значэнні прадукцыйнасці (уключаючы, але не абмяжоўваючыся, A100, A800, H100, H800, L40, L40S, і RTX 4090). Пад дзеянне забароны таксама падпадае «любая сістэма, якая ўключае адну ці некалькі пакрытых інтэгральных схем (уключаючы, але не абмяжоўваючыся, сістэмы NVIDIA DGX і HGX)».
Па словах міністаркі гандлю ЗША Джыны Раймонда, адміністрацыя ЗША ўводзіць гэтыя правілы, каб кантраляваць доступ да высокапрадукцыйных вылічальных чыпаў, у першую чаргу з мэтай абмежаваць магчымасці Кітая ў развіцці сваіх тэхналогій, асабліва ў ваенных мэтах.
Гэтыя новыя правілы таксама закліканыя закрыць пэўныя шчыліны, якія засталіся пасля мінулай забароны і дазвалялі замежным кампаніям набываць такія чыпы і экспартаваць іх у краіны, на якія накладзена эмбарга.
Nvidia заявіла, што новыя абмежаванні могуць перашкодзіць яе здольнасці завяршыць распрацоўку новых прадуктаў у адпаведнасці з графікам, а таксама прымусяць перанесці пэўныя аперацыі з адной ці некалькіх краін, ахопленых забаронай.
Чытайце яшчэ:
The New York Times: ЗША ўводзяць забарону на пастаўкі графічных чыпаў Nvidia і AMD у Расію і Кітай
Nvidia запланавала вытворчасць новых чыпаў, якія стануць канкурэнтам Intel
Каментары