У аўтамабілі, які належыць канцылярыі прэзідэнта Польшчы, супрацоўнікі Службы дзяржаўнай аховы краіны летам гэтага года выявілі прыладу адсочвання геалакацыі. Пра гэта піша «Еўрапейская праўда» са спасылкай на польскі тэлеканал TVN24.
Паводле звестак тэлеканала, летам 2023 года супрацоўнікі Службы дзяржаховы Польшчы нібыта выявілі ў адным з аўтамабіляў канцылярыі прэзідэнта Анджэя Дуды лакатар. Гэта адбылося падчас працэдуры агляду аўтамабіля на выпадак, калі ў ім заклалі выбухны зарад.
Лакатар дазваляў адсочваць месцазнаходжанне аўто ў рэжыме рэальнага часу. TVN24 сцвярджае, што аўто ўваходзіла ў склад картэжа, які суправаджаў Дуду ў прыватнасці падчас паездак ва Украіну — але сам Дуда ў ім не ездзіў.
Супрацоўнік Службы дзяржаўнай аховы Польшчы на ўмовах ананімнасці распавёў тэлеканалу, што машына магла ездзіць з лакатарам «некалькі месяцаў». Пасля інцыдэнту спецслужбы пачалі правяраць усе аўто, якія суправаджаюць першых асоб краіны.
У канцылярыі прэзідэнта ў адказ на запыт TVN24 заявілі, што не каментуюць пытанняў, звязаных з забеспячэннем бяспекі першай асобы дзяржавы, але ўдакладнілі, што рашэнне аб праверках аўто прымае менавіта Служба дзяржаховы.
Расследаваннем інцыдэнту павінна было заняцца Агенцтва ўнутранай бяспекі Польшчы, але невядома, ці сапраўды яно адбылося і якія былі яго вынікі.
СМІ раней паведамлялі, што супрацоўнікі выведкі Вялікабрытаніі выявілі прынамсі адну прыладу сачэння кітайскай вытворчасці падчас планавай праверкі аўтамабіляў урадавых і дыпламатычных ведамстваў.
Каментары