Прэмію сёлета ўручаць у дзвюх намінацыях, паведамляе bellit.info.
На прэмію за найлепшую дэбютную кнігу прозы прэтэндуюць:
- Канстанцін Касяк. Самаізаляцыя. — Электронная кніга, 2022.
- Таццяна Карытка. Чаму ўсё так? — Выдавецтва «Кнігазбор», 2020.
- Антось Уласенка. Новая зямля: Куканія. — «Издательские решения», 2021.
На прэмію за найлепшы мастацкі пераклад намінуюцца:
- Алена Карп за пераклад з французскай мовы кнігі Маржан Сатрапі «Персеполіс». — Выдавецтва «Янушкевіч» («Пфляўмбаўм»), Мінск, 2022.
- Яўген Папакуль за пераклад са старажытнаісландскай мовы «Эды Сноры Стурлусана». — Выдавецтва «Галіяфы», Мінск, 2021.
- Андрэй Строцаў за пераклад з англійскай мовы кнігі Клайва Стэйплза Льюіса. Хронікі Нарніі: Прынц Каспіян. − Выдавецтва «Пазітыў-цэнтр», Мінск, 2022.
Прэмію «Дэбют» у галіне паэзіі за 2021-2022 гады вырашана не ўручаць.
У конкурсе ўдзельнічаюць дэбютныя мастацкія кнігі, напісаныя ці перакладзеныя на беларускую мову і выдадзеныя ўпершыню ў папяровым або электронным выглядзе ў 2021 і 2022 гадах.
У склад журы прэміі ўвайшло пяцёра сябраў: літаратуразнаўца Ульяна Верына; пісьменніца Святлана Курс; паэт і перакладчык Уладзімір Лянкевіч; паэт, перакладчык, выкладчык літаратуры Андрэй Хадановіч; паэтка і перакладчыца Юлія Цімафеева.
Літаратурная прэмія «Дэбют» імя Максіма Багдановіча была заснавана ў 2010 годзе пры падтрымцы Беларускага ПЭН-цэнтра, Саюза беларускіх пісьменнікаў і дабрачыннага Фонду «Вяртанне». Яна ўручаецца ў намінацыях «Паэзія», «Проза», «Мастацкі пераклад» за найлепшыя дэбютныя кнігі, выдадзеныя па-беларуску. Сёлета суарганізатарамі прэміі выступаюць Bellvory Stiftung (Switzerland), Беларускі ПЭН і Міжнародны саюз беларускіх пісьменнікаў.
Беларускія абрады, арнаменты і беларуская мова паўсюль. Як нашчадак перасяленцаў зрабіў сяло каля Байкала зноў беларускім, і чаму гэта можа хутка скончыцца99
Каментары