У Тэнерыфэ прыбыў круізны лайнер з успышкай хантавіруса. Пасажыраў эвакуіруюць і адправяць у свае краіны
У порт Гранадзілья на іспанскім востраве Тэнерыфэ ў нядзелю раніцай прыбыло нідэрландскае судна MV Hondius, на борце якога зафіксавана ўспышка небяспечнага хантавіруса і памерлі тры чалавекі.
Іспанскія ўлады сумесна з СААЗ распрацавалі строгі пратакол бяспекі для высадкі людзей. Судна стаіць на якарнай стаянцы на максімальнай адлегласці ад прычала, а пасажыраў даставяць на бераг невялікімі лодкамі па 10 чалавек.
Першымі борт пакінулі 14 іспанцаў, якіх адразу накіравалі ў вайсковы шпіталь для поўнай ізаляцыі і ПЦР-тэставання.
Для астатніх замежнікаў Германія, Францыя, ЗША і іншыя краіны ўжо накіравалі спецрэйсы, каб эвакуяваць сваіх грамадзян адразу пасля праверкі медыкамі.
Нягледзячы на пратэсты мясцовых жыхароў, якія прайшлі напярэдадні, СААЗ настойвае, што рызыка для грамадскага здароўя на востраве застаецца нізкай.
Хантавірус, які пераносіцца грызунамі, выклікае цяжкія паражэнні лёгкіх і нырак. Спецыфічнага лячэння не існуе, а смяротнасць пры некаторых формах захворвання дасягае 40%.
На гэты момант новых сімптомаў у тых, хто застаўся на борце, пакуль не выяўлена, аднак трое хворых былі экстрана эвакуяваны яшчэ падчас прыпынку на Каба-Вердэ.
Лайнер, які выйшаў з Аргенціны яшчэ 1 красавіка, стаў месцам трагедыі: ад інфекцыі там памерлі тры чалавекі — пажылая пара з Нідэрландаў і грамадзянка Германіі.
Каментары
Праблема ў тым, што інкубацыйны перыяд у хантавіруса занадта доўгі - да 8 тыдняў, таму цягнецца ўся гэтая бадзяга з пасажырамі лайнера