«Відавочны прыклад палітыкі імперыялізму і неакаланіялізму». Савет Рэспублікі заклікаў спыніць блакаду Кубы
Прэзідыум Савета Рэспублікі апублікаваў заяву аб неабходнасці спынення эканамічнай, фінансавай і гандлёвай блакады, уведзенай ЗША супраць Рэспублікі Куба, якая ўжо цягнецца больш за 60 гадоў. Навіна ў тэлеграм-канале верхняй палаты суправаджаецца дзвюма маланкамі.
«Прэзідыум Савета Рэспублікі Нацыянальнага схода рашуча выступае за спыненне эканамічнай, гандлёвай і фінансавай блакады, уведзенай Злучанымі Штатамі Амерыкі супраць Кубы, якая працягваецца звыш 60 гадоў. Яна з'яўляецца абуральным парушэннем агульнапрызнаных нормаў і прынцыпаў міжнароднага права, самым бесчалавечным актам эканамічнага генацыду, відавочным прыкладам палітыкі імперыялізму і неакаланіялізму», — гаворыцца ў заяве.
«У сувязі з міжнародным Днём правоў чалавека, які адзначаецца 10 снежня, і 75-годдзем прыняцця Усеагульнай дэкларацыі правоў чалавека мы зноў падкрэсліваем: аднабаковыя прымусовыя меры аказваюць негатыўнае ўздзеянне на рэалізацыю асноўных правоў чалавека, спараджаюць глабальныя рызыкі і пагрозы для чалавецтва, з'яўляюцца адной з галоўных перашкод на шляху дасягнення мэт устойлівага развіцця», — трывожацца ў Савеце Рэспублікі.
«Выказваем сваю салідарнасць з дружалюбным кубінскім народам у супрацьдзеянні незаконнай санкцыйнай палітыцы ЗША і спробам умяшання ў справы Кубы», — рэзюмуюць у ведамстве.
Каментары