У Расіі заўважылі, што санаторый «Беларусь» у Сочы 12 гадоў не плаціць за электрычнасць
16 мая ў Арбітражным судзе Краснадарскага краю будзе разгледжаны пазоў прадпрыемства «Сочыцеплаэнерга» да санаторыя «Беларусь», размешчанага ў Сочы, паведамляе ТАСС са спасылкай на сайт электроннага судаводства РФ. Уладальнік гэтага санаторыя — Кіраўніцтва спраў Аляксандра Лукашэнкі.
Як сцвярджаецца, санаторый з 2011 да 2023 года завінаваціўся за электраэнергію 129,4 тысяч расійскіх рублёў. Прытым пеня за гэты час дасягнула 156,8 тыс. рублёў, таму агульная сума, якую «Сочыцеплаэнерга» хоча спагнаць з санаторыя, складае 286,2 тыс. рублёў (каля 3,12 тыс. даляраў).
Санаторый «Беларусь» мае тры зоркі, тут ёсць сем нумароў катэгорыі «апартаменты», 12 — «люкс», 225 — «першая катэгорыя».
Побач з санаторыем размешчаная сочынская рэзідэнцыя Лукашэнкі, у якой ён спыняецца падчас візітаў у паўднёвыя рэгіёны Расіі.
Каментары