«Аб’яднаныя дэмакратычныя сілы зарэкамендавалі сябе рэальнай палітычнай апазіцыяй уладам»,— заявіў сустаршыня АДС, лідэр Аб’яднанай грамадзянскай партыі Анатоль Лябедзька, каментуючы вынікі пасяджэння палітрады кааліцыі, якое прайшло 24 студзеня ў Мінску.
«Вельмі важна выразна заявіць, — лічыць палітык, — што ў краіне ёсць палітычная апазіцыя, у якой ёсць адказы на тыя пытанні, што хвалююць людзей. І што апазіцыя — дзеяздольная, што мы прапаноўваем пазітыўную альтэрнатыву ў дакументах і асобах. Некаторыя успрымаюць так, што ёсць толькі асноўныя гульцы на палітычным полі — гэта Аляксандр Лукашэнка, гэта Расія і Брусель, а палітычнай апазіцыі ўнутры краіны няма.
Сённяшняя нарада павінна даць адказ — палітычная апазіцыя ёсць, і ў ёй ёсць пазітыўная альтэрнатыва для Беларусі і яе грамадзян».
Сустаршыня АДС, лідэр Беларускай партыі левых «Справядлівы свет» Сяргей Калякін сказаў: «Мэта сённяшняй сустрэчы — паказаць грамадству, у першую чаргу яго дэмакратычнай частцы, над чым працуюць дэмакратычныя сілы, што ім удаецца і што не ўдаецца. Паслухаць нашых актывістаў з месцаў, якія лепш, магчыма, чым мы, ведаюць, якая сітуацыя складваецца, для таго каб не памыліцца ў той стратэгіі, што будзе прынята».
На пытанне, што ж, на думку Калякіна, найперш не ўдаецца дэмакратычным сілам, ён адказаў: «Самае галоўнае, што не ўдаецца дэмакратычным сілам, — перастаць быць дэмакратычнай апазіцыяй, а стаць дэмакратычная уладай. Мы павінны шукаць шляхі, як вырашыць гэту задачу. Пакуль мы яе не вырашылі, значыць мы неэфектыўна працуем».
У пасяджэнні палітрады, якое прайшло ў сталічным гатэлі Crowne Plaza, узялі ўдзел разам з гасцямі 89 чалавек, у тым ліку 28 членаў палітрады, прадстаўнікі васьмі пасольстваў, а таксама офіса АБСЕ ў Беларусі.
Цяпер чытаюць
Усе гадаюць, чаму Месяц змяніў сваё становішча на небе. Спыталі ў астранома, што адбываецца2
Усе гадаюць, чаму Месяц змяніў сваё становішча на небе. Спыталі ў астранома, што адбываецца
Часам нечаканая гісторыя беларускіх гімнаў: «Мы выйдзем шчыльнымі радамі», «Пагоня», «Жыве Беларусь», «Радзіма мая дарагая», «Магутны Божа» (з ВІДЭА)1212
Каментары