У Нямеччыне конкурс на пасаду наглядчыка маяка перавысіў 1100 чалавек на месца
Патрабуецца добрая фізічная форма, але і заробак прыстойны.
![](http://nnexpictures.fra1.digitaloceanspaces.com/img/w732d4webp1/photos/z_2024_05/majak_ap240521-bwuya.jpg.webp)
На востраве Вангероге ў Паўночным моры шукалі наглядчыка старажытнага маяка XIX стагоддзя. Ён не выкарыстоўваецца для навігацыі, там працуе музей, назіральная пляцоўка і зала шлюбаў, піша Bild.
Ад патэнцыйнага наглядчыка патрабавалася добрая фізічная форма, бо штодня некалькі разоў трэба паднімацца па 161 прыступках. Іншыя задачы — прадаваць квіткі і сувеніры, суправаджаць турыстаў, праводзіць уборку і невялікі рамонт, даглядаць сад.
Жыць на маяку нельга, наглядчыку даюць кватэру ў адным з дамоў на востраве. Усяго там каля 1000 жыхароў. Заробак ад 2500 еўра ў месяц.
За тры месяцы конкурсу на гэтую пасаду прыйшло нечакана шмат заявак — больш за 1100 штук.
Мясцовыя ўлады правялі 45 сумоўяў узялі Дэніэла Ёхайма — маладога бацьку сямейства з захаду Германіі. Ён выйдзе на працу 1 чэрвеня. Жонка і дзеці пераедуць на Вангероге пазней.
Каментары