Толю Шанэля, які 20 гадоў жыве ў пад'ездзе, паспрабавалі выселіць — яго забрала міліцыя. Праз дзень ён вярнуўся
Эпапея з мужчынам, які жыве ў пад'ездзе ў Серабранцы, працягваецца.
Толя Шанэль вось ужо больш за 20 гадоў жыве ў пад'ездзе дома на праспекце Ракасоўскага ў Мінску. Калісьці ён пабудаваў у гэтым доме кватэру і жыў там з жонкай і дзецьмі. Аднак пасля разводу ён «пераехаў» у пад'езд, пры гэтым захаваўшы прапіску.
Гісторыю Толі, які ўладкаваў жыллё на тэхнічным паверсе, распавёў Onliner. Старыя жыхары дома ставяцца да мужчыны са спачуваннем, падкормліваюць яго і аддаюць яму вопратку. Аднак новыя пастаяльцы незадаволеныя суседствам з бамжом.
Цяпер Толю Шанэля спрабуюць выселіць. Аднак, як аказалася, гэтая місія не такая простая. Жыхарка дома распавяла Onliner, што нядаўна Толю забрала міліцыя:
«У той жа дзень (дзень публікацыі артыкула) да нас у пад'езд прыехаў ЖЭС і дзве гадзіны вывозіў смецце (там было ўсё што заўгодна — ад старых матрацаў да валізак і сумак).
Самога Толю забрала міліцыя. Але літаральна праз дзень ён вярнуўся назад, спачатку ашываўся пад суседнім пад'ездам, а потым спакойна сядзеў пад нашым. Увечары ён ужо катаўся на ліфце на свой апошні паверх. Усё ў яго добра. У адрозненне ад нас, жыхароў дома. Гэта ненармальна, што ў пад'ездзе бамжуе чалавек, атручваючы тым самым жыццё астатнім. Не магу зразумець аднаго: як так атрымалася, што ён зноў вярнуўся назад?».
Усё ўскладнена тым, што мужчыну нельга прызнаць афіцыйна бяздомным — у яго ёсць прапіска ў канкрэтнай кватэры.
У ЖКГ Ленінскага раёна распавялі, што міліцыя забірала Толю ўжо не раз, але ён заўсёды вяртаецца.
«Утрымліваць яго як бяздомнага РУУС не можа: грамадзянін мае прапіску і месца жыхарства па паказаным адрасе. Проста чалавек жыве ў пад'ездзе, але пры гэтым лічыцца не бамжом, а мясцовым жыхаром», — адзначыла намесніца дырэктара ЖКГ Ленінскага раёна Алена Крамская ў інтэрв'ю «Мінск-навінам».
Са слоў спецыяліста, Толя цяпер 2-3 тыдні пажыве ў сястры. Вяртацца ў кватэру па месцы прапіскі ён даўно не збіраецца. Аднак жыць у пад'ездзе яму зручна:
«Ёсць цэлы пад'езд чуллівых жыхароў, якія яму і суп прыносяць, і ствараюць неабходны камфорт. Анатоль знаходзіцца на ўтрыманні сваіх суседзяў. Мы, вядома, будзем рабіць захады, каб яго адтуль выселіць, аднак пакуль будзем глядзець, ці вернецца ён».
Дапамагала высяляць Толю з пад'езда прыбіральшчыца Людміла. Яна распавяла, што з яго жылля вывезлі цэлы трактар рэчаў:
«Я калі чатыры гады таму прыйшла сюды мыць пад'езды, то была ў шоку: бомж жыве пад лесвіцай, а людзі церпяць гэта ўсё!
Мы трактар рэчаў з гарышча выцягнулі. На пастаянным месцы жыхарства Анатоля рэчаў сапраўды было мала. Але, магчыма, нейкім чынам ён зрабіў выхад на самы верх, куды цягам 20 гадоў прыносіў свае знаходкі. Чаго там толькі не было!»
Разгледзець «кватэру» Толі ў шахце ліфта няпроста: жыхар прадбачліва вешае на дзверы замок, які не цалкам зашчоўкваецца, але стварае ілюзію зачыненых дзвярэй.
Каментары