Прэм'ерам стане 61-гадовы Кір Стармер.
Апазіцыйная Лейбарысцкая партыя перамагае на выбарах у Палату грамадаў Вялікабрытаніі. Такія звесткі экзітполу, апублікаванага Бі-бі-сі пасля закрыцця ўчасткаў увечары ў чацвер, паведамляе Расійская служба Радыё Свабода.
Паводле даных апытання на выхадзе з участкаў, праведзенага кампаніяй Ipsos, лейбарысты могуць атрымаць 410 месцаў у Палаце грамадаў з 650, то-бок абсалютную большасць. Чакаецца, што іх лідар Кір Стармер сфармуе ўрад.
Кансерватары пасля 14 гадоў ва ўладзе адправяцца ў апазіцыю. Іх вынік згодна з экзітполам — 131 месца, што некалькі больш, чым прадказвалі перадвыбарныя апытанні. На трэцім месцы ліберал-дэмакраты, яны могуць разлічваць на 61 мандат.
У парламент праходзяць і прыхільнікі Найджэла Фараджа з правапапулісцкай Партыі рэформаў (13 мандатаў). Значна паменшыцца прадстаўніцтва шатландскіх нацыяналістаў — толькі 10 месцаў. 4 месцы атрымаюць валійскія нацыяналісты, на два можа прэтэндаваць партыя Зялёных.
Паколькі выбары праводзяцца па мажарытарнай сістэме, і ў акругах адрывы паміж кандыдатамі могуць быць вельмі невялікімі, канчатковыя вынікі могуць адрознівацца ад даных экзітполу, аднак перамога лейбарыстаў выглядае прадвызначанай.
Вынікі падліку галасоў стануць вядомыя да раніцы. Верагодна, ужо 5 ліпеня прэм'ер-міністр Рышы Сунак, які стаў прэм'ерам у кастрычніку 2022 года, афіцыйна падасць у адстаўку.
Лейбарысты праводзілі кампанію пад левацэнтрысцкімі, адносна памяркоўнымі лозунгамі (сам Стармер прадстаўляе цэнтрысцкае крыло).
Яны заяўляюць, што палітыка Лондана ў дачыненні да Украіны не зменіцца — Брытанія працягне падтрымліваць гэтую краіну ў супрацьстаянні з Расіяй.
Лейбарысцкая (Рабочая) партыя была створана ў 1900 годзе, упершыню прыйшла да ўлады роўна сто гадоў таму, у 1924 годзе (урад Рамсэя Макдональда) і з таго часу стала галоўнай апазіцыйнай партыяй Кансерватыўнай партыі. Былі ўрады Клемента Этлі, Гаральда Вільсана, Джэймса Калагана, Тоні Блэра, апошні лейбарысцкі ўрад быў Гордана Брауна (2007—2010).
Маладую супрацоўніцу «Пеленга» арыштавалі за «заклікі да нанясення шкоды Беларусі». Ёй пагражае да 12 гадоў3
Каментары