Ці праўда, што віно беларускага разліву — шмурдзяк? «Ды што вы!» — кажа энолаг
Якія віны беларускага разліву найлепшыя? І ці сапраўды гэта шмурдзяк? Спыталі ў эксперта-энолага.
У Расіі прапануюць ставіць на віне беларускага разліву блямбы «Гэта не віно». А бізнэс-лабіст Барыс Цітоў назваў яго «шмурдзяком». Мы запыталі ў беларуса-энолага — эксперта па вінах, які цяпер працуе за мяжой, як бы ён ацаніў якасць вінаградных вінаў беларускага разліву? Гэта сапраўды «не віно» ці гэта проста «вельмі ардынарнае віно»?
«Хутчэй гэта вельмі звычайнае віно, як правіла, зробленае з самага таннага вінаматэрыялу,— патлумачыў энолаг. — У сусветнай віннай практыцы перавозка віна ў цыстэрнах і разліў на месцы продажу — не рэдкасць. Шмат вінаў з Новага Свету разліваюць у бутэлькі ў Брытаніі, Германіі і Францыі. Новазеландскі «Савіньён Блан», перавезены праз акіян у велізарным марскім кантэйнеры і разліты недзе каля Гамбурга — даўным-даўно норма», — кажа спецыяліст.
Нічога ў віне не «ламаецца», не «парушаецца» пры перавозцы ў цыстэрнах на далёкі завод для разліву, тлумачыць спецыяліст.
Аднак пытанне ў тым, які вінаматэрыял закупляюць і ці вытрымліваюцца тэхналогіі пры яго разліве.
«Беларускія вытворцы не парушаюць тэхналогіі, а можа і больш пра яе дбаюць, чым некаторыя вытворцы з Заходняй Еўропы,— упэўнены эксперт.— Усё залежыць ад таго, што ліць. А ліць могуць усё», — дадае ён.
«Расіяне такім чынам абараняюць цяпер свой рынак і свае схемы. Яны раней самі лілі такі балк і не парыліся. А цяпер у іх забаранілі імпартаваць вінаматэрыял з «варожых краін», з Францыі, з Іспаніі танны матэрыял. А беларускія вытворцы працягваюць гэта рабіць. Вось на іх і апалчыліся».
На думку эксперта, беларускія вытворцы дарма купляюць танны вінаматэрыял і «не вераць у сябе, не вераць, што могуць зрабіць прыгожа ды прадаць потым даражэй».
Якія з вінаў беларускага разліву энолаг можа вылучыць, парэкамендаваць, ахарактарызаваць?
«Не ведаю. Я іх не каштую», — развёў рукамі эксперт.
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА77
Каментары