51 нобелеўскі лаўрэат заклікаў неадкладна спыніць вайну ва Украіне і канфлікт у сектары Газа
Сярод падпісантаў — нобелеўскі лаўрэат па літаратуры Святлана Алексіевіч.
51 нобелеўскі лаўрэат падпісаў ліст да палітыкаў і рэлігійных лідараў з заклікам аб неадкладным спыненні агню паміж Расіяй і Украінай і ў сектары Газа. Пра гэта сведчыць зварот, апублікаваны сёння расійскай «Новай газетай».
Падпісанты адзначылі наступствы вайны супраць Украіны для розных краін, у прыватнасці гаворка ідзе пра сітуацыю з харчаваннем у краінах Афрыкі і міграцыйных працэсах у Еўропе. Яны таксама выказалі незадаволенасць ростам абаронных бюджэтаў у свеце.
Акрамя таго, нобелеўскія лаўрэаты заявілі, што на войнах больш гінуць людзі ва ўзросце ад 30 да 40 гадоў, дадаўшы: «Гэта азначае, што кожныя 100 тысяч забітых — гэта 4 мільёны гадоў будучыні!
Яны заклікалі прыняць у адносінах да войнаў ва Украіне і сектары Газа наступныя меры:
- неадкладнае спыненне агню;
- абмен палонных па прынцыпе «ўсіх на ўсіх», вызваленне закладнікаў і вяртанне целаў загінулых;
- пачатак перамоваў.
«Калі палітыкі не могуць дамовіцца, то хай аднясуць вырашэнне пытанняў на суд будучых пакаленняў і спыняць агонь», — гаворыцца ў лісце.
Зварот адрасаваны Папу Рымскаму, Усяленскаму патрыярху Варфаламею, Далай-ламе XIV, удзельнікам войнаў, ААН, Еўрапарламента і Парламенцкай асамблеі Рады Еўропы.
Сярод падпісантаў — нобелеўскі лаўрэат па літаратуры Святлана Алексіевіч, аўстрыйская пісьменніца Эльфрыда Елінек, рэдактар «Новай газеты» Дзмітрый Муратаў.
Цяпер чытаюць
Колькасць судоў па палітычных крыміналках зменшылася ў разы12
Каментары