Паліне Шарэндзе-Панасюк зноў «прынеслі» зялёныя яблыкі замест прадуктовай перадачы

Зноў праблемы з прадуктовай перадачай

Паводле крыніцы, якую Андрэй Шарэнда не можа называць з інтарэсаў бяспекі, пасля вяртання ў гомельскае СІЗА ягоную жонку чакала тая ж гісторыя з прадуктовай перадачай, як і летась.

«Нібыта ад невядомай асобы ёй паступілі пакункі з зялёнымі яблыкамі. У выніку цяпер месячная норма перадачы прадуктаў у 30 кілаграмаў лічыцца выбранай, і больш у гэтым месяцы для яе нічога не прымуць.

Гэтак і раней рабілі: перадавалі Паліне то мех гнілой морквы, то мех бітых яблык, як мінулым летам. Такі здзек, псіхалагічны ціск на Паліну і на нас, яе сваякоў.

У СІЗА добра ведаюць пра хваробу Паліны, што ў яе праблемы са страўнікам і залозай, а мы спрабуем перадаць ёй добрыя прадукты. Дык каб нічога не атрымала», — мяркуе муж Паліны Андрэй Шарэнда.

Паводле Андрэя Шарэнды, летась сваякам усё ж удавалася перадаць для Паліны харчовыя перадачы.

«Атрымалася адзін раз у снежні перад этапам. Яны ў снежні не закінулі ёй нічога, дык сваякі адмыслова ездзілі ў Гомель, каб перадаць свежую гародніну, садавіну, сыр, каўбасу. Звычайны набор прадуктаў. І пасылку з рэчамі ў СІЗА прынялі. А ў калонію за 5 месяцаў увогуле нічога перадаць не атрымалася. І вось зноў нічога», — расказаў Андрэй Шарэнда.

Паводле яго слоў, Паліну Шарэнду-Панасюк працягваюць трымаць у рэжыме інкамунікада — апошні ліст ад яе сям’я атрымала ў канцы 2023 года.

«Экспертызы як такой і не было»

Псіхолага-псіхіятрычную экспертызу Паліна Шарэнда-Панасюк праходзіла ў Рэспубліканскім навукова-практычным цэнтры псіхічнага здароўя ў пасёлку Навінкі пад Мінскам, дзе ў тым ліку даследуюць тых, каго падазраюць у злачынствах. Паводле крыніцы, на якую спасылаецца Андрэй Шарэнда, вынік экспертызы, якую прайшла Паліна, нічым не адрозніваецца ад дзвюх іншых, якія ў яе былі ў ранейшыя гады зняволення.

«Прызнаная нармальнай, што ім і трэба, каб чарговы раз кінуць яе за краты як асуджаную, — сказаў Андрэй Шарэнда. — А экспертызы як такой і не было цяпер. Толькі пагутарылі з ёй, можа, з гадзінку, і ўсё. Яна ж, як атрымліваецца, толькі тыдзень там была. Гэта мінімальны час паміж этапамі».

«На прагулкі амаль не выводзяць»

Пра тое, як цяпер пачуваецца і як выглядае Паліна Шарэнда-Панасюк, звестак няшмат.

«Вельмі бледная. Бо на прагулкі месяц не выводзілі і, магчыма, цяпер амаль не выводзяць. Яўна схуднела. І псіхалагічна ёй пасля этапаў вельмі цяжка», — кажа муж палітзняволенай Андрэй.

18 ліпеня стала вядома, што Паліна хворая на «хранічны панкрэатыт сярэдняй цяжкасці» — вельмі небяспечную для здароўя хваробу, лекаванне якой ускладняецца ва ўмовах зняволення. Пра дыягназ сваякам стала вядома з афіцыйнага адказу адміністрацыі папраўчай калоніі № 24, дзе трымаюць палітзняволеную Шарэнду-Панасюк.

• 0
• 0
• 0
• 0
• 0
• 3
• 15
• 2