Экс-дырэктара шклозавода «Нёман» судзяць за здраду дзяржаве. Пагражае да 15 гадоў
Ігар Бацян больш за 12 гадоў узначальваў шклозавод «Нёман». Пасля вызвалення з пасады ён сышоў у кіраўніцтва хакеем, а пасля апынуўся ў цені. Цяпер стала вядома, што Бацян у СІЗА, прычым артыкул — палітычны, хоць мужчына не быў заўважаны ў руху за свабодныя выбары.
![](http://nashaniva.com/img/w840d4webp1/photos/z_2024_08/out-2024-08-13t17440589711-9msp3.jpg.webp)
Ігару Бацяну 60 гадоў. Родам ён з Ліды. Пасля школы паехаў вучыцца ў Мінск у Беларускі дзяржаўны політэхнічны інстытут (цяпер — БНТУ) па спецыяльнасці «Машыны і тэхналогія ліцейнай вытворчасці».
Невядома, дзе ён працаваў у савецкі час, але ў незалежнай Беларусі кар'ера задалася. З 2000 па 2004 гады Бацян працаваў дырэктарам па маркетынгу на Лідскім піўзаводзе. А неўзабаве яго прызначылі кіраўніком шклозавода «Нёман» у Бярозаўцы — горадзе ў Лідскім раёне
![](http://nashaniva.com/img/w732d4webp1/photos/z_2024_08/out-2024-08-13t16534151511-nt5ap.jpg.webp)
Праца ішла не без складанасцяў — за адсутнасць аддачы ад завода ў 2009-м Бацяна пакрытыкаваў КДК, пасля чаго на яго завялі крымінальную справу. Бацян у адказ пачаў слаць чалабітныя Лукашэнку, пад якімі змушаў падпісвацца работнікаў завода.
«Мы верныя свайму Прэзідэнту і іншага Кіраўніка нашай дзяржавы не ўяўляем», — пісалася ў звароце. Праўда, самі работнікі тады казалі «Нашай Ніве», што Бацян для іх чужы, а ўмовы працы на заводзе вельмі цяжкія.
![](http://nashaniva.com/img/w732d4webp1/photos/z_2024_08/out-2024-08-13t18014546511-hb2jk.jpg.webp)
![](http://nashaniva.com/img/w732d4webp1/photos/z_2024_08/out-2024-08-13t18083127511-sp4qc.jpg.webp)
Тады Бацяна не пасадзілі, патрымаўшы пад падпіскай, а справа неяк замялася.
Наступны «казус» адбыўся ў 2014 годзе. Тады дзяржмедыя пісалі, што Бацян «адкажа матэрыяльна» за зрыў праекта па адкрыцці вытворчасці шклаваты на заводзе «Нёман». Праз год цэх адкрыўся, але з'явілася новая праблема — жыхары Бярозаўкі былі незадаволеныя пагаршэннем якасці паветра, адказваць зноў давялося Бацяну.
![](http://nashaniva.com/img/w732d4webp1/photos/z_2024_08/911-27n43.jpeg.webp)
У выніку дырэктара знялі з пасады ў 2017 годзе. Бацян не разгубіўся ды адкрыў у сабе талент хакейнага менеджара — узначаліў аддзел дзіцяча-юнацкага хакея і развіцця Федэрацыі хакея Беларусі.
![](http://nashaniva.com/img/w732d4webp1/photos/z_2024_08/out-2024-08-13t1737588321-iu8bw.jpg.webp)
Імаверна, хакеем ён цікавіўся і дагэтуль — у 2016 ён гераічна абараняў айчынны хакей у каментарах выдання Tribuna.com. Пасля 2018 года Ігар Бацян знік з радараў.
![](http://nashaniva.com/img/w732d4webp1/photos/z_2024_08/screenshot2024-08-13at160711-c0w66.jpg.webp)
![](http://nashaniva.com/img/w732d4webp1/photos/z_2024_08/screenshot2024-08-13at160721-5lrgt.jpg.webp)
У 2020-м Бацян публічна ніяк сябе не праявіў. 16 жніўня, у дзень найбольш масавых у гісторыі сучаснай Беларусі пратэстаў, ягоны тэлеграм-акаўнт уступіў у вялікую суполку ябацек «За Беларусь!», але нічога не пісаў. Магчыма, яго туды проста запрасілі — туды закінулі некалькі тысяч функцыянераў за адзін дзень, дакладна па разнарадцы зверху.
На старонках у сацсетках Ігар Бацян публікуе іконы ды выявы святых, цытаты розных вядомых людзей мінулага, фота ды відэа з падарожжаў, песні пра веліч шматнацыянальнай Расіі. А сярод яго падпісак у асноўным расійскія медыя (з якіх на першым месцы канал «Царьград»), рэлігійныя суполкі, а таксама паблікі пра падарожжы ды прыроду. Нічога не выдае ў ім праціўніка рэжыму.
![](http://nashaniva.com/img/w732d4webp1/photos/z_2024_08/screenshot2024-08-13at182008-x9iol.jpg.webp)
Бацян перастаў быць анлайн ва ўсіх сацсетках у кастрычніку 2023 года – імаверна, тады яго і затрымалі.
Суд над Бацяном пачнецца 26 жніўня ў Гродзенскім абласным судзе. Яго абвінавачваюць у «здрадзе дзяржаве» (ч. 1 арт. 356 КК). Яму пагражае ад 7 да 15 гадоў калоніі. Акалічнасці справы невядомыя.
«Наша Нiва» — бастыён беларушчыны
ПАДТРЫМАЦЬ
Каментары