Васкрасенскі запрасіў кіраўніка МЗС Польшчы прыехаць у наваполацкую калонію і забраць Пачобута
«Усе, хто сочаць за маёй палітычнай дзейнасцю, ведаюць, што я адказваю за кожнае слова».
![](http://nashaniva.com/img/w840d4webp1/photos/z_2024_08/azarenok-9bp25.jpg.webp)
Беларускія прапагандысты працягваюць абмяркоўваць сітуацыю з палітзняволеным журналістам Анджэем Пачобутам. Юрый Васкрасенскі зрабіў гучную прапанову ў эфіры ў Рыгора Азаронка:
«Прапанова адкрытая. Міністр замежных спраў [Польшчы] Сікорскі можа сесці на машыну, прыехаць і забраць Пачобута. Я гатовы сустрэць Сікорскага на мяжы. Усе, хто сочаць за маёй палітычнай дзейнасцю, ведаюць, што я адказваю за кожнае слова. Разам заедзем у наваполацкую калонію, забярэм Пачобута — і паглядзім, як ён адкрые дадатковы пункт [пропуска на мяжы]. Ніякай перашкоды з нашага боку няма. Прыязджай — і забірай».
![](http://nashaniva.com/img/w732d4webp1/photos/z_2024_08/paobut240802-k9rrf.jpg.webp)
Складана патлумачыць, якую ролю Васкрасенскі выконвае цяпер. У 2020-м яму, былому зборшчыку подпісаў за Віктара Бабарыку, Лукашэнка даручаў заняцца вызваленнем палітвязняў, але справа заглухла амаль адразу ж. На нейкі час яму далі статус «канструктыўнага апазіцыянера», але і з гэтага нічога не выйшла. Ролю нефармальнага перамоўшчыка з Захадам Васкрасенскі таксама не пацягнуў.
Каментары