Венесуэлка, якая працуе на БТ, распавяла, чаму яе сям'я думае, што яна ў Беларусі вельмі багатая. Прычыны вас здзівяць
Венесуэлка Кайла Пінеда ўжо 10 гадоў жыве ў Беларусі, а апошнія два гады працуе вядучай на БТ. Яна таксама актыўна вядзе тыкток, дзе дзеліцца тым, што яе здзіўляе і ўражвае ў нашай краіне.
Як жа Кайлу занесла за 10 тысяч кіламетраў ад радзімы? У адным з інтэрв'ю яна распавядала, што прыехала за каханым. Гісторыя сапраўды рамантычная. 13 гадоў таму дзяўчына раптам пабачыла ў адным з кафэ Каракаса прывабнага беларускага хлопца. Пара проста пераглядвалася — а потым кожны пайшоў па сваіх справах.
Але праз тыдзень Кайла нечакана зноў сустрэла замежніка ў тым самым кафэ. На гэты раз маладыя людзі вырашылі ўсё ж пазнаёміцца.
Хлопца звалі Андрэй, і ён працаваў юрыстам. А ў Венесуэлу прыехаў, каб Беларусь туды змагла прадаць МАЗы.
Выпадковае знаёмства ператварылася ў сапраўднае каханне. Недзе праз год Кайла адправілася ў Брэст, каб пабачыць бацькоў Андрэя.
Вы здзівіцеся, але больш за ўсё дзяўчыну тады ўразіла яблыня — яна адразу пайшла фатаграфавацца з дрэвам. Бо ў Венесуэле ўсюды растуць манга. А вось яблыкі вельмі рэдкія і дарагія, іх не ўсе могуць сабе дазволіць. Іх звычайна купляюць ці на свята, ці калі чалавек хварэе — каб парадаваць экзотыкай.
У Каракасе Кайла вучылася на журналістку. Дзяўчына добра разумела, што некалі прыйдзе момант, калі Андрэю прыйдзецца вярнуцца ў Беларусь. Але калі гэты дзень надышоў, хлопец прапанаваў ёй паляцець разам.
З аднаго боку, Кайлу пужала тое, што на рускай мове яна ведае ўсяго толькі некалькі слоў. З іншага — у Венесуэле ўжо пачынаўся эканамічны крызіс. На фоне гэтага рашэнне эміграваць выглядала рацыянальна.
Кажа, што адаптавацца на новым месцы было складана — толькі ў Беларусі яна адчула, як моцна можа ўплываць шэрае надвор'е на настрой. Крыху здзіўлялі і беларусы, якія ў адрозненне ад венесуэльцаў не вельмі шчодрыя на ўсмешкі.
У Мінску Кайла паступіла ў МДЛУ. Праз два гады пара пабралася шлюбам.
Доўгі час венесуэлка працавала ў Mediacube — займалася іспанамоўнымі YouTube-каналамі. Потым была праца ў A4 Production. Атрымаўшы неабходны досвед, дзяўчына вырашыла стварыць свой YouTube-канал і назвала яго «ДавайКай». Кайла здымала ролікі пра сябе, пра культуру Венесуэлы, пра сваё бачанне Беларусі. Цяпер на канале 71 тысяча падпісчыкаў.
У 2023 годзе на творчасць Кайлы звярнула ўвагу Белтэлерадыёкампанія. Яе запрасілі стаць адной з вядучых праграмы «Як дома» на «Беларусь 2». У гэтым праекце замежнікі з экзатычных для нас краін ездзяць па розных мясцінах Беларусі, знаёмяцца са славутасцямі, размаўляюць з мясцовымі жыхарамі, спрабуюць гатаваць нацыянальныя стравы, танчыць, а таксама спяваць народныя песні.
У Кайлы таксама ёсць два акаўнты ў тыктоку, на якія агулам падпісана каля 38 тысяч чалавек. Нядаўна дзяўчына распавяла, чаму яе сваякі і сябры ў Венесуэле думаюць, што яна вельмі багата жыве ў Беларусі.
І першая прычына — гэта тое, што Кайла часта купляе вінаград.
— Нягледзячы на тое, што ў Беларусі вінаград імпартны, тут ён таннейшы, чым у Венесуэле. Таму на маёй радзіме ядуць вінаград толькі перад Новым годам, каб загадаць жаданне.
Але самае галоўнае, што ўражвае блізкіх Кайлы, — гэта тое, што яна мае ванну ў кватэры. Дзяўчына жартуе, што яна сама, калі ўпершыню прыляцела ў Беларусь і ўбачыла ванну «як у кіно», падумала, што яе хлопец — мільянер.
— Але потым я даведалася, што мець ванну — гэта нармальна. Але ж не для Венесуэлы. Бо ў нас тыя, хто мае ванну, сапраўдныя мільянеры. А ў Беларусі нават сабакі і каты купаюцца ў ванне.
«Наша Нiва» — бастыён беларушчыны
ПАДТРЫМАЦЬЦяпер чытаюць
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА77
Каментары
ахх... ну цяпер зразумела, чаму Дизайнер не хоча беларускую "прынцэсу", а хоча чорную - бо для яе "бедный художник" будзе мільянер