Абноўленыя прэпараты накіраваныя супраць новых штамаў каранавіруса і забяспечваюць больш надзейную абарону.
Федэральнае ўпраўленне па кантролі якасці прадуктаў харчавання і лекаў (FDA) ухваліла абноўленыя вакцыны ад COVID-19, распрацаваныя кампаніямі Pfizer і Moderna. Прэпараты накіраваныя супраць распаўсюджаных цяпер штамаў каранавіруса і забяспечваюць больш надзейную абарону ад цяжкіх сімптомаў, паведамляе «Голас Амерыкі».
Фармацэўтычныя кампаніі пачнуць пастаўляць мільёны доз вакцын праз некалькі дзён.
Трэцяя фармацэўтычная кампанія, Novavax, заявіла, што чакае ўхвалення сваёй абноўленай вакцыны ў найбліжэйшы час.
Федэральныя цэнтры па кантролі і прафілактыцы захворванняў (CDC) рэкамендавалі абноўленыя прышчэпкі для дарослых і дзяцей, старэйшых за 6 месяцаў.
Новыя вакцыны былі ўхвалены на фоне новай хвалі заражэнняў COVID-19 і росту шпіталізацыі і смерцяў, звязаных з гэтым захворваннем. Аднак пасля піку пандэміі попыт на вакцынацыю знізіўся.
«Мы настойліва раім усім, хто адпавядае крытэрам, разгледзець магчымасць увядзення абноўленай вакцыны ад COVID-19, каб атрымаць больш эфектыўную абарону ад штамаў, якія цыркулююць зараз», — заявіў кіраўнік аддзела вакцын FDA доктар Пітэр Маркс, падкрэсліўшы, што «вакцынацыя па-ранейшаму з'яўляецца краевугольным каменем прафілактыкі COVID-19».
Рашэнне адмовіцца ад новай прышчэпкі — «небяспечны шлях», заявіў доктар Роберт Хопкінс-малодшы з Нацыянальнага фонду інфекцыйных захворванняў. Нават калі пацыент лёгка перанёс папярэдняе заражэнне, без новай вакцыны наступнае заражэнне каранавірусам можа аказацца больш цяжкім або прывесці да зацяжных сімптомаў COVID.
Хопкінс таксама заклікаў людзей, якія схільныя да высокай рызыкі сур'ёзных захворванняў або смерці ад COVID-19, як мага хутчэй запісацца на атрыманне абноўленай вакцыны.
Да груп высокай рызыкі адносяцца пажылыя, людзі са слабой імуннай сістэмай або сур'ёзнымі захворваннямі, а таксама цяжарныя жанчыны.
Прадстаўнікі органаў аховы здароўя таксама заклікаюць памятаць, што, хоць папярэднія заражэння і вакцынацыі ад COVID-19 даюць некаторы імунітэт ад віруса, гэты імунітэт не вечны.
Леташнія прышчэпкі былі накіраваныя на штам каранавіруса, які больш не з'яўляецца шырока распаўсюджаным.
Прадстаўнікі органаў аховы здароўя таксама спрабуюць зняць асцярогі з нагоды адначасовай вакцынацыі ад COVID-19 і ад грыпу. Па іх словах, гэта нармальна і больш зручна.
Апошнім часам рост захворванняў на кавід фіксуецца ў суседніх з Беларуссю Польшчы і Украіне. Галоўны санітарны доктар Польшчы нават рэкамендаваў насіць маскі.
Коля Лукашэнка сыграў на раялі на «Дні народнага адзінства». Яго тата перад гэтым прыгразіў Трэцяй сусветнай вайной34
Каментары