Уласнік аўто, якое правалілася пад зямлю ў Бабруйску, расказаў, ці выплацілі яму кампенсацыю за гэта
«Ну і што цяпер, на вуліцу не выходзіць», — па-філасофску заўважае бабруйчанін Аляксандр. Гэта яго аўтамабіль першым восеньскім днём праваліўся пад зямлю на паркоўцы каля дома №197 па Сацыялістычнай. Непрыемныя ўражанні аб тым, што здарылася, яшчэ свежыя ў яго памяці, піша «Вячэрні Бабруйск».
На злашчасную стаянку Аляксандр прыехаў не адзін. У салоне Renault Espace знаходзілася ўся яго сям'я: на пярэднім сядзенні — жонка, на заднім шэрагу размясціліся дзеці — 6-гадовы сын і 16-гадовая дачка.
— Усёй сям'ёй прыехалі ў кафэ «Атмасфера», каб паесці сушы, — кажа суразмоўца. І працягвае: — Пачаў паркавацца, як тут жа правалілася пярэдняе левае кола. Выглянуў у акно і ўбачыў яму без дна. Сваім блізкім сказаў хутка адшпіліцца і выйсці з машыны. Усе выйшлі. Выклікаў ДАІ.
Па словах Аляксандра, супрацоўнік Дзяржаўтаінспекцыі звязаўся з прадстаўніком «Водаканала», той аператыўна прыбыў на месца. Туды ж прыехала і «Ніва», з дапамогай якой і паспрабавалі адбуксіраваць «Рэно» ад небяспечнага месца. Якраз у гэты час мінівэн і сышоў пад зямлю.
— Ад моманту, калі мы прыехалі, да абвальвання грунту прайшло прыкладна паўгадзіны, — распавядае Аляксандр.
Увесь гэты час сям'я знаходзілася побач. Неабыякавыя гараджане, кажа суразмоўца, як маглі, спрабавалі супакоіць жонку і дзяцей. Чуллівая жанчына прынесла вады з валяр'янкай.
Машына правяла ў зямлі амаль тры гадзіны. Як кажа Аляксандр, амаль усе кузаўныя элементы пацярпелі: парогі, дзверы, увесь левы бок, шкло, дах.
— Больш за ўсё дасталася франтальнай частцы — разбітыя і пакамячаныя пярэдні бампер, капот, фары, — пералічвае пашкоджанні ўладальнік.
Рухавік запускаецца, але сваім ходам мінівэн едзе з цяжкасцю. Ад падзення і ўдару пацярпела і хадавая частка: машыну вядзе ўбок.
На наступны дзень бабруйчанін звярнуўся ў кампанію, дзе застрахаваная яго грамадзянская адказнасць як кіроўцы.
— Адказалі, што нестрахавы выпадак. Калі б «каска», тады можна было б разлічваць на кампенсацыю, — кажа ўладальнік.
З суразмоўцам звязаўся і прадстаўнік «Водаканала»:
— Паведамілі, што будуць заказваць экспертызу ў гандлёва-прамысловай палаце. Да экспертызы ніякага рамонту рабіць нельга. Калі яе правядуць — невядома. Як па мне, так найбольш справядлівым рашэннем была б поўная выплата мне кошту аўтамабіля, а машыну «Водаканал» хай бы забраў сабе.
Пакуль Аляксандр і яго блізкія ездзяць на аўтамабілі, які належыць жонцы.
Свой Renault Espace 4 2003 года выпуску Аляксандр купіў у 2010 годзе. Сам прыганяў з Літвы. За гэты час на дызельным мінівэне бабруйчанін праехаў каля 200 тысяч кіламетраў. Гэтым летам сям'ёй ездзілі на аўто ў Сочы. Машына ў дарозе не падвяла.
На сустрэчы Снапкова з бізнэсам адзін з запрошаных заклікаў зняць відэазварот «Надо!» Як адрэагавалі астатнія?10
Каментары
=====
Мы за вас радыя