Тэлекампанія ABC і газета New York Times паведамілі, што начальнік расійскага Генеральнага штаба Валерый Герасімаў на мінулым тыдні меў «вельмі незвычайную» тэлефонную размову са старшынёй Аб'яднанага камітэта начальнікаў штабоў ЗША генералам Чарльзам Браўнам.
Герасімаў патэлефанаваў Браўну 27 лістапада і папярэдзіў аб будучых выпрабавальных пусках гіпергукавых ракет з расійскіх караблёў у Міжземным моры. 3 снежня расійскае Міністэрства абароны абвясціла публічна, што выпрабаванне адбылося ва ўсходняй частцы Міжземнага мора, піша Радыё Свабода.
Па звестках New York Times, Герасімаў таксама сказаў амерыканскаму калегу, што выпрабаванне новай ракеты, якую Крэмль называе «Арэшнік», было запланавана задоўга да таго, як адміністрацыя Байдэна дазволіла Украіне ўжываць ATACMS па цэлях на прызнанай тэрыторыі Расіі.
Уладзімір Пуцін прадстаўляў удар гэтай ракетай як адказ на першы ўдар ATACMS па расійскай тэрыторыі.
ABC і New York Times паведамляюць пра змест гутаркі са слоў ананімных крыніц у Пентагоне. Прэс-сакратар Браўна, капітан Джэрыл Дорсей, пацвердзіў факт тэлефанавання і дадаў, што «па просьбе генерала Герасімава генерал Браўн пагадзіўся не абвяшчаць пра змест званка па сваёй ініцыятыве».
Масква пакуль нічога не паведамляла пра гэтую размову.
Каментары