Усё-ткі канцэраген. Вось што навукоўцы высветлілі пра папулярны напой ерба матэ
Аматары гэтай гарбаты называюць яе здаровай альтэрнатывай каве. Яна дае энергію, дапамагае схуднець, павышае канцэнтрацыю і ўмацоўвае імунітэт. Але ў яе ёсць і цёмныя бакі.
Гаворка ідзе пра ерба матэ (yerba mate). «Наша Ніва» і раней пісала пра яе.
Польскі партал Pacjent.pl, спасылаючыся на навуковыя даследаванні, тлумачыць, што ўжыванне ерба матэ можа мець сур’ёзныя пабочныя эфекты.
Навукоўцы выявілі, што ў ербе матэ прысутнічае канцэрагеннае рэчыва — поліцыклічны араматычны вуглевадарод (ПАВ). Гэта тое ж рэчыва, якое знаходзіцца таксама ў вэнджаным мясе і цыгарэтным дыме. Гэта асноўная прычына, чаму варта абмежаваць ужыванне гэтага напою.
Даследаванне 2019 года таксама паказала, што людзі, якія не курылі, але пілі матэ, мелі ў арганізме столькі ж шкодных рэчываў, колькі і курцы.
Згадваецца таксама іншае даследаванне, мэтай якога было супаставіць вынікі ўжывання ербы матэ і выкурвання 100 цыгарэт. Навукоўцы адзначылі, што традыцыйны спосаб заварвання напою з вялікай колькасці лісця і невялікай колькасці вады можа прывесці да такой канцэнтрацыі бензапірэну, якая ўтвараецца ў выніку выкурвання чатырох-пяці пачак папяросаў.
І хоць спосаб трапляння рэчыва ў арганізм у гэтых выпадках адрозніваецца, трэба памятаць пра меру і не піць матэ так, як раяць некаторыя вытворцы, гэта значыць на працягу ўсяго дня.
Яшчэ адна небяспека звязана з піццём гарачага матэ. Піццё вельмі гарачай гарбаты можа выклікаць тэрмічныя траўмы і павышае рызыку раку, а ў выпадку ербы на гэта накладваюцца дадатковыя рызыкі, аб якіх была гаворка вышэй.
Найчасцей ерба матэ прадаецца ў выглядзе змеленых лісцяў у пакеціках, як звычайная гарбата. Гэты спосаб падрыхтоўкі лічыцца больш бяспечным. Акрамя таго, рэкамендуецца астуджаць напой перад ужываннем.
Даследаванні ербы матэ працягваюцца, і прадстаўленыя вышэй рызыкі грунтуюцца на імавернасных высновах. Тым не менш не варта іх ігнараваць. Лепш абапірацца на здаровы сэнс і рэкамендацыі экспертаў: адзін кубак астуджанага напою ў дзень не нашкодзіць і не павысіць рызыкі захворвання.
Загінуў беларускі добраахвотнік Васіль «Дзір» Рапіцкі11
Каментары