У мужчыны не было грошай на спатканне — ён пракраўся на мінскі завод і балгаркай выразаў медныя перахаднікі
Сустрэча з былой жонкай можа каштаваць мужчыну 12 гадоў турмы.
У сакавіку 2024 года жыхар Смаргонскага раёна прыехаў у Мінск сустрэцца з былой жонкай. Грошай у 34-гадовага мужчыны не было, але ён прыдумаў, дзе іх здабыць.
Мужчына пранік на тэрыторыю мінскага завода, пералезшы цераз плот. Ён накіраваўся да ліцейнага цэха. Дзверы былі зачыненыя, але зламаць дужку навяснога замка аказалася проста — ён проста пацягнуў замок рукой, пішуць «Мінск-Навіны».
У цэху захоўваліся сілавыя кабелі з меднымі канектарамі. Каб аддзяліць іх, мужчына зайшоў у кабінет начальніка і ўзяў адтуль балгарку, якой адпілаваў перахаднікі. Здабычу мужчына склаў у заплечнік і пакінуў тэрыторыю завода. Пасля ён прадаў канектары знаёмаму за 800 рублёў.
Злодзея хутка затрымалі. Як высветлілі следчыя, мужчына пранік на завод у стане алкагольнага ап'янення. Агульная сума нанесенай прадпрыемству шкоды склала больш за 96,6 тысячы рублёў.
Мужчыну, які ўжо быў судзімы, абвінавачваюць у наўмысным пашкоджанні чужой маёмасці, што пацягнула прычыненне шкоды ў асабліва буйным памеры. Яму пагражае ад 7 да 12 гадоў калоніі.
Каментары