На мяжы з Беларуссю літоўскія памежнікі завярнулі рэкордную колькасць нелегальных мігрантаў
Доўгі час мігрантаў на мяжы амаль не было.
У мінулыя суткі літоўскія памежнікі завярнулі на беларускай мяжы рэкордную колькасць нелегальных мігрантаў — 48 чалавек. Выявіць іх дапамог верталёт памежнікаў, піша Delfi.
Паводле Службы аховы дзяржаўнай мяжы (САДМ), з кастрычніка 2023 года гэта рэкордная колькасць завернутых мігрантаў — тады іх было 54 чалавекі.
Мігранты падзяліліся на гурты ад 4 да 12 чалавек, у некаторых з іх былі нажніцы для разразання канцэрціны.
Замежнікі прадставіліся грамадзянамі Афганістана, дакументаў пры іх не было, дапамогі ў літоўскіх памежнікаў яны не прасілі, паведамляе САДМ. «Яны распавялі, што беларускія памежнікі нібыта іх везлі і забралі дакументы», — дадалі ў Службе.
Сёлета літоўскія пагранічнікі папярэдзілі пранікненне 72 нелегальных мігрантаў у Літву з Беларусі.
Некаторы час, прыблізна каля 20 дзён, літоўскія памежныя службы не фіксавалі спробаў нелегальных мігрантаў трапіць у Літву.
У 2024 годзе літоўцы не ўпусцілі 1002 нелегальных мігранта з Беларусі. У 2023 годзе — 2643. У 2022 годзе літоўскія памежнікі завярнулі 11 211 мігрантаў з Беларусі, якія спрабавалі незаконна патрапіць на тэрыторыю Літвы.
Усяго з пачатку міграцыйнага крызісу, справакаванага беларускім рэжымам, літоўскія памежнікі не ўпусцілі ў краіну 23034 імігрантаў, якія спрабавалі зрабіць гэта нелегальна.
Каментары