Арменія і Азербайджан завяршылі працу над мірнай дамовай, але перашкоды застаюцца
Арменія і Азербайджан, якія вялі серыю войнаў з канца 1980-х гадоў, завяршылі тэкст доўгачаканага мірнага пагаднення, накіраванага на ўсталяванне афіцыйных адносін, што стала значным крокам на шляху да спынення дзесяцігоддзяў ваенных дзеянняў, піша «Радыё Свабода».
Міністэрства замежных спраў Арменіі пацвердзіла 13 сакавіка, што Ерэван прыняў прапановы Азербайджана па двух неўзгодненых артыкулах пагаднення, фактычна завяршыўшы перамовы па тэксце. Міністэрства прапанавала правесці кансультацыі з Азербайджанам па даце і месцы падпісання.
Прэм’ер-міністр Арменіі Нікол Пашынян паведаміў журналістам у Ерэване, што праект мірнай дамовы з'яўляецца кампрамісам і што ягоная краіна гатовая пачаць кансультацыі па тэрмінах падпісання дамовы.
«У нас няма ніякіх таямніц ад нашага грамадства ў гэтым тэксце, які, па сутнасці, быў апублікаваны цалкам. Я не думаю, што можна сказаць, што грамадства не знаёмае з яго зместам», — сказаў Пашынян, падкрэсліўшы, што Арменія і Азербайджан не будуць размяшчаць замежныя войскі ўздоўж мяжы пасля падпісання дамовы.
Міністр замежных спраў Азербайджана Джэйхун Байрамаў заявіў журналістам 13 сакавіка, што «перамоўны працэс па тэксце мірнай дамовы афіцыйна завершаны», дадаўшы, што «апошнія два нявырашаныя пункты былі разгледжаны, і Арменія прыняла прапановы Азербайджана».
Нягледзячы на прарыў, Азербайджан сцвярджае, што дамова не можа быць падпісаная, пакуль Арменія не перагледзіць сваю канстытуцыю і прававую базу, каб выдаліць любыя спасылкі на тэрытарыяльныя прэтэнзіі на рэгіёны ўнутры Азербайджана, пераважна спасылкі на Нагорны Карабах.
«Гэта неабходная папярэдняя ўмова для падпісання мірнага пагаднення», — сказаў Байрамаў.
Каментары