Мінскі гастрабар з беларускай кухняй хацеў раздаваць салдацкую кашу. Але адмовіўся ад ідэі, бо народ не зацаніў
Акцыя кафэ да 9 Мая выклікала шмат спрэчак.
«Заўтра з 12:00 будзем частаваць вас салдацкай кашай, а таксама зможаце атрымаць бясплатную настойку», — такі допіс апублікаваў у Трэдс мінскі гастрабар «Лампа», які хоча быць самай лямпавай беларускай установай.
Аўдыторыя ідэю не зацаніла. Нехта напісаў каментар, што сёння ў многіх папоўніцца чорны спіс устаноў, і атрымаў амаль тысячу падабаек.
«Барані мяне кот ад салдацкай кашы і бясплатнай чаркі», «Зноў рамантызацыя вайны», — пішуць.
«Вы так добра пачыналі… навошта гэта ўсё?? Якая нафіг каша салдацкая??? Як яна карэлюе з вашым беларускім меню?? Ну што ж вы робіце самі з сабой?» — задаецца пытаннямі іншы каментатар.
Адразу некалькі чалавек згадалі раздачу бліноў з лапаты, як гэта некалі рабілі ў Расіі, таму пачалі ўдакладняць пра метад падачы стравы: «А бліны з лапаты?», «З рыдлёўкі хоць?».
Хацелі прывабіць турыстаў з Расіі?
Многія адзначылі, што такія забавы дакладна не для беларусаў, таму пачалі задаваць шмат пытанняў, ці не на гасцей з усходу ідзе разлік.
«Гэта вы так расійскіх турыстаў завабліваеце?», «Гэта вы для прыезджых расіян, відаць, пастараліся».
«Нарэшце з'явілася месца, якое можна смела рэкамендаваць гасцям «Белорусіі», — з іроніяй напісаў адзін каментатар.
Прыслухаліся да каментатараў
Прыкладна праз 13 гадзін пасля абвяшчэння акцыі ва ўстанове апублікавалі інфармацыю, што пачулі меркаванні людзей, таму адмовіліся ад задумы.
«Мы адмяняем палявую кухню. Бачым усе вашы паведамленні, рэпосты, трэдсы — прызнаём, што гэтая ідэя ад нас няўдалая па розных прычынах.
Мы з самага пачатку стараліся да вас прыслухоўвацца і працягваем гэта рабіць. Вы для нас важныя».
Гэты допіс набраў больш за сотню каментароў.
Вось як гучыць самы ўпадабаны: «Хлопцы, вы — малайцы! Я вамі ганаруся! Такая сапраўдная беларускасць мне падабаецца. Звычайна ў такіх сітуацыях беларускія бізнэсы зносяць усе пасты, згадкі і робяць выгляд, што нічога не было.
Вы паказалі прыклад годнага і сумленнага стаўлення да сваіх гасцей. Памыляцца — не страшна. Страшна — не прызнаваць свае памылкі і не выпраўляць іх», — напісала жанчына.
Паляцела з абодвух бакоў
Пры гэтым сярод каментароў можна знайсці і меркаванні тых, хто лічыць, што халяўная палявая каша з чаркай могуць не падабацца толькі тым, хто з'ехаў з Беларусі і жыве ў краінах ЕС.
«А яшчэ чаго гэта вы ў Беларусі працуеце, а не пераехалі ў Польшчу? Усім вядома, што самыя «правільныя» і «добрыя» жывуць у Польшчы і Літве і не святкуюць 9 Мая. Будзьце ўжо да канца паслядоўнымі і мігруйце на радасць тым, пад каго вы мімікрыруеце. Дно, адным словам», — напісаў мужчына.
Што за «Лампа»?
Установа зусім нядаўна адкрылася і працуе ў тэставым рэжыме. Сябе «Лампа» пазіцыянуе як беларускую кухню без пафасу пад этна-матывы.
Месціцца гастрабар па адрасе Кастрычніцкая, 23. Раней там былі «Іскра» і Enzo.
Той самы масажыст расказаў, навошта здымаў голых кліентак2
Каментары
А Вы точно мірныя людзі?