Сямён Субоцін быў затрыманы армянскімі ўладамі на 72 гадзіны ў рамках стандартнай працэдуры.
Як паведамляе «Медыязона» са спасылкай на экспертку праваабарончай арганізацыі «Грамадскі вердыкт» Асмік Новікаву, 24-гадовы Сямён Субоцін, які раней праходзіў службу ў дывізіі ў Іванаўскай вобласці, быў затрыманы армянскімі ўладамі на 72 гадзіны ў рамках стандартнай працэдуры, падчас якой армянскі бок павінен паведаміць Расіі пра чалавека, які знаходзіцца ў вышуку, а расійскі бок — перадаць у адказ матэрыялы крымінальнай справы ў дачыненні да яго.
20 ліпеня Субоцін быў вызвалены з ІЧУ, аднак праваабаронцы заўважылі побач з ізалятарам людзей у расійскай вайсковай форме. Яны папярэдзілі паліцэйскіх, і тыя даставілі яго ў паліцэйскі ўчастак «Эрэбуні».
«Армянскія паліцэйскія зрэагавалі і зрабілі ўсё неабходнае, каб наш падабаронны быў у бяспецы», — цытуе Новікаву «Медыязона». Паводле яе слоў, цяпер Расія можа на працягу 40 дзён падаць запыт на экстрадыцыю Субоціна, у адваротным выпадку, пасля заканчэння тэрміну, армянскі бок здыме яго з вышуку.
«Калі ж расійскі бок падрыхтуе дакументы па экстрадыцыі, то далей армянскія судовыя ўлады будуць вырашаць пытанне [пра выдачу]. І гэта зусім не азначае, што выдача адбудзецца», — падкрэсліла Новікава.
Як піша «Медыязона», Субоцін быў абвешчаны ў вышук не пазней за люты 2025 года.
Расійскія вайскоўцы неаднаразова выкрадалі ў Арменіі тых, хто ўцёк з арміі РФ, дастаўлялі іх на расійскую вайсковую базу ў Гюмры, а потым перапраўлялі ў Расію.
Каментары