«Матрошкамі ўжо не здзівіш». У Расіі заклікалі стварыць свой аналаг Лабубу
Старшыня Савета Федэрацыі Расіі Валянціна Матвіенка заклікала развіваць крэатыўную індустрыю і стварыць расійскі аналаг кітайскай папулярнай цацкі Лабубу. Яна адзначыла, што адна толькі гэтая цацка прынесла свайму стваральніку мільярдныя прыбыткі.
Матвіенка выказала шкадаванне, што расійскія прадукты народнай творчасці, напрыклад, матрошкі, ужо не выклікаюць цікавасці ў свеце: «Іх ніхто на сумках не носіць», — сказала яна.
Чыноўніца задалася пытаннем, чаму Расія не можа прапанаваць нешта моднае і крэатыўнае, што стане сусветным трэндам. Яна падкрэсліла, што краіна багатая на таленавітых людзей, але ім не хапае падтрымкі.
«Цяпер адзін бізнэсмен з Кітая распрацаваў ляльку, па-мойму, Лабубу яна называецца. Пачвара, глядзець немагчыма, але ўвесь свет захварэў на гэту ляльку. Усе носяць гэтую ляльку на торбах, гэта модна, гэта стыльна, здабываюць там не ведаю якімі спосабамі. Чалавек зарабіў дзясяткі мільярдаў на гэтай прадукцыі па ўсім свеце», — панаракала Матвіенка.
Лабубу — гэта маленькія цацкі-монстрыкі з каляровай поўсцю, якія сталі моднымі сярод дзяцей і дарослых па ўсім свеце. Іх вобраз стварыў ганконгскі дызайнер і пісьменнік Лун Цзяшэн, які натхняўся скандынаўскай міфалогіяй. З 2019 года цацкі выпускае кампанія Pop Mart, і цяпер іх існуе больш за 300 варыянтаў. Асаблівую цікавасць выклікае тое, што купец не ведае, якую менавіта фігурку ён набывае — гэта стварае азарт і стымулюе збіраць калекцыі.
Па стане на ліпень 2025 года капіталізацыя Pop Mart склала $41,5 мільярдаў і перасягнула нават расійскі «Газпрам», які ацэньваецца ў $38,9 мільярда.
У нядзелю ў Мінску пройдзе фестываль лабубу
Вытворца лялек Лабубу абышоў па сваёй капіталізацыі «Газпрам»
Дызайнеркі прапанавалі беларускую альтэрнатыву папулярнай ляльцы Лабубу
Рэчыцкія прапагандысты апалчыліся на лялек Лабубу
Мілыя ці пачварныя? Чаму лялькі Labubu сталі сусветнай сенсацыяй
За месяц попыт на лялек Лабубу вырас на «Куфры» ў 6,5 раза
Каментары