Раніцай 8 жніўня ў пасёлку Афіпскі, што ў Краснадарскім краі Расіі, украінскае Галоўнае ўпраўленне разведкі правяло атаку на вайсковую частку 90-й зенітна-ракетнай брыгады, паведамляе РБК-Украіна на падставе сведчання сваіх крыніц ва ўкраінскай разведцы.
У выніку выбухаў, як паведамляецца, загінулі як мінімум 12 расійскіх вайскоўцаў, яшчэ дзясяткі былі параненыя, а таксама знішчаная вайсковая тэхніка.
Вакол месца выбухаў хутка сабраліся машыны хуткай дапамогі і спецслужбаў. Мясцовыя ўлады абвясцілі рэжым «антатэрарыстычнай аперацыі» і перакрылі раён.
Каб схаваць факт атакі, расійскія ўлады распаўсюдзілі інфармацыю, нібыта выбухі адбыліся праз няспраўнасць газавага абсталявання ў машыне, а ФСБ пачала выдаляць згадкі пра здарэнне ў СМІ і сацсетках.
Паводле сведчанняў ГУР, гэтая брыгада ўдзельнічала ў баявых дзеяннях супраць Украіны на Херсонскім і Запарожскім кірунках.
Каментары