Як зменіцца вуліца Валгаградская: якія будынкі ўзвядуць і што добраўпарадкуюць
Вуліца Валгаградская паступова змяняе свой выгляд. У бліжэйшы час сур'ёзная трансфармацыя чакае квартал каля праспекта Незалежнасці, піша «Мінск-Навіны».
— Яшчэ некалькі гадоў — і вуліца пераўтворыцца, — распавядае першы намеснік кіраўніка адміністрацыі Першамайскага раёна Максім Сакалоў. — Першая лінія паступова запаўняецца шматкватэрнымі дамамі, а сядзібная забудова захаваецца ў глыбіні кварталаў па цотным баку. Сёння завяршаецца будаўніцтва жылля на ўчастку каля Лагойскага тракту, і ў найбліжэйшыя гады асноўныя работы будуць весціся недалёка ад праспекта Незалежнасці, на тэрыторыі, якая раней належала заводу «Агат».
Што пабудуюць
— Па праекце тут прадугледжана ўзвядзенне дзевяці дамоў — гэта больш за 70 тысяч кв. м жылля, — тлумачыць Сакалоў. — Два будынкі будуць паводле індывідуальных праектаў, астатнія — панэльныя. Агульныя планы ўжо ёсць, але паколькі перш за ўсё праектуюцца і будуюцца інжынерныя сеткі, могуць узнікнуць пэўныя карэкціроўкі. Запланаваныя рознай вышыні дамы, адна– і двухсекцыйныя.
Акрамя жылля, запланаваныя дзіцячы садок на 210 месцаў, шматпавярховы паркінг на 520 машын і гандлёва-грамадскі цэнтр плошчай 2 000—2 500 кв. м.
Школу будаваць не будуць — дастаткова магчымасцей у суседняй СШ № 63.
Добрая навіна і для жыхароў існуючых мікрараёнаў: уздоўж вул. Кедышкі з’явіцца пешаходная дарога ад Валгаградскай да медустаноў, бліжэйшых да Філімонова. Зараз тут толькі народная сцежка ўздоўж старога заводскага плота. Гэту агароджу прыбяруць, і на яе месцы будзе добраўпарадкаваная тэрыторыя.
Жыллё ў новым квартале будзе прызначана для тых, хто мае патрэбу, пераважна для шматдзетных сем’яў.
Па чарзе
Праект уключае тры чаргі будаўніцтва. Першая — падрыхтоўчая: знос 31 будынка. Зараз засталося ліквідаваць чатыры аб’екты, уключаючы корпус ліцейнага цэха і вытворчыя будынкі ўздоўж вул. Кедышкі.
Яшчэ два заводскія карпусы па 20 тыс. кв. м утрымліваюць трансфарматарныя і размеркавальныя падстанцыі, звязаныя з жыллём, адміністрацыйнымі будынкамі і дзейным заводам.
Пакуль не будуць пабудаваныя новыя падстанцыі і не адключана старое абсталяванне, знос немагчымы. Плануецца завяршыць усе працы ў гэтым годзе. Да кастрычніка «Мінскпраект» падрыхтуе план інжынерных сетак, пасля чаго вызначыцца чарга будаўніцтва дамоў.
Знос не закране будынкі ў пачатку вул. Валгаградскай і былы заводскі офіс — ён застанецца на месцы.
-
Мінчук зняў ролік пра чаргу ў паліклініцы, дзе было больш за 150 чалавек. За гэта на мужчыну напісалі заяву ў міліцыю
-
Юліяна Шаметавец з «Кіберпартызанаў» стала маці — расказвае пра дэкрэтны адпачынак у ЗША і тое, ці сапраўды можна сумяшчаць працу з мацярынствам
-
Каверын выбачыўся за прапанову эратычнай фотасесіі для Ціханоўскай
Цяпер чытаюць
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю6
Каментары