У Церцеля прагучаў новы акцэнт: «разрадка ў цэлым той напружанасці» ў адносінах з Польшчай і Балтыяй
З заявай па выніках нарады даручылі выступіць кіраўніку КДБ. Ён выказаў упэўненасць пра магчымую «разрадку напружанасці» з Захадам.
Іван Церцель пасля нарады ў Лукашэнкі, дзе абмяркоўваліся абстаноўка ў свеце і адносіны з ЗША, выказаўся пра адносіны з краінамі Заходняй Еўропы.
«Вядома ж, адносіны з нашымі суседзямі (абмяркоўваліся). Гэта Польшча традыцыйна, гэта Прыбалтыка. Напэўна, не будзе вялікай таямніцай сказаць, што ў нас ёсць каналы зносін з нашымі партнёрамі. Гэты дыялог вядзецца. І ў тым ліку па лініі спецслужбаў.
Я б сказаў, што паразуменне паміж намі паволі наладжваецца. Мы абмяркоўваем вострыя пытанні і недзе выходзім на разуменне ўзаемных інтарэсаў», — заявіў кіраўнік КДБ.
«Наш узаемны інтарэс — гэта стабільная сітуацыя ў рэгіёне, працуючая эканоміка, занятасць людзей. Гэта спакойнае жыццё нашых грамадзян з перспектывай на будучыню, адсутнасць канфліктных сітуацый, разрадка ў цэлым той напружанасці, якая ёсць і пра якую мы ўсе практычна чуем», — сказаў Іван Церцель.
Ён лічыць, што ёсць усе шанцы на тое, каб дасягнуць прарыву ў адносінах.
«Мы маем усе шанцы на тое, каб дасягнуць прарыву ў цэлым у адносінах з ЗША. Для Заходняй Еўропы мы адкрыты для гэтага. Думаю, у бліжэйшы час мы пачуем добрыя навіны на гэтым напрамку», — сказаў ён.
«Перакананы, што ў канчатковым выніку гэта паслужыць вельмі важным крокам у вырашэнні гэтага канфлікту», — сказаў Іван Церцель.
Іван Церцель таксама падкрэсліў, што Беларусь настроена на дыялог, пошук узаемапрымальных рашэнняў з улікам нацыянальных інтарэсаў: «Мы выпрацавалі свае прапановы, сваю перагаворную пазіцыю. Па шэрагу пытанняў мы з амерыканскім бокам ужо прыйшлі да кансэнсусу. Але неабходна разумець нашым партнёрам, што ёсць нацыянальныя інтарэсы, якія мы заўсёды будзем улічваць і рэалізоўваць гэтак жа, як і амерыканцы, — практычны, рацыянальны падыход да перагаворнага працэсу, у тым ліку з улікам выключна нашых нацыянальных інтарэсаў».
Ён расказаў, што і Лукашэнка ў гэты парадак дня вельмі глыбока пагружаны, амаль кожны дзень ім займаецца. «Важна таксама, што ёсць адпаведнае разуменне і ў прэзідэнта ЗША Дональда Трампа, які вельмі шмат робіць для ўрэгулявання на Блізкім Усходзе, пагружаны і ў парадак дня па Украіне.
Сёння Лукашэнка на нарадзе заявіў, што афіцыйны Мінск гатовы на вялікую здзелку з ЗША.
«Будзем чакаць іх [амерыканцаў] прапановы глабальныя, вялікай здзелкі, як яны ўмеюць казаць (любяць яны гэтыя вялікія здзелкі). Мы да гэтага гатовыя. Мы гатовыя з імі заключыць вялікую здзелку. На адной шалі іх пытанні, просьбы і патрабаванні, на другой шалі — нашы пытанні і патрабаванні. Рашаем? Давайце будзем вырашаць. Мы да гэтага гатовыя.
Прапановы Дональда Трампа ў гэтым плане я абсалютна ацэньваю нармальна. Але павінны быць улічаныя і нашы інтарэсы. І ўсё павінна быць шчыра, як калісьці мы з амерыканцамі дамовіліся», — сказаў Лукашэнка.
Цяпер чытаюць
Адданага ябацьку, які абражаў Святлану Ціханоўскую ў Threads, кінулі за краты21
Адданага ябацьку, які абражаў Святлану Ціханоўскую ў Threads, кінулі за краты
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых1111
Каментары
Пачынайце з вызвалення паляка, затрыманага ў Лепелю па фальсіфікаванай справе.