Еўракамісія аштрафавала Х за непразрыстасць і птушачку, «якая ўводзіць у зман». Ілан Маск заклікаў распусціць ЕС
Еўракамісія аштрафавала сацыяльную сетку X на 120 мільёнаў еўра за парушэнне Закона аб лічбавых паслугах. Гэта рашэнне выклікала моцнае абурэнне як ва ўладальніка сацсеткі, мультымільярдэра Ілана Маска, так і ў прадстаўнікоў дзяржаўных уладаў ЗША.
Прэтэнзіі Еўрасаюза выклікалі:
- сіняя птушачка, якая «ўводзіць у зман»: яна падаецца як пацвярджэнне асобы ўладальніка акаўнта, але насамрэч кампанія не праводзіць ніякіх праверак, а птушачкі проста прадае;
- непразрысты архіў рэкламы: X не дае поўнага доступу да інфармацыі пра рэкламныя кампаніі, уключаючы іх змесціва і заказчыкаў, што павялічвае рызыку махлярства і распаўсюджання шкоднай інфармацыі;
- забарона аўтаматызаванага збору публічных даных: платформа перашкаджае працы старонніх «робатаў», якія збіраюць даныя, патрэбныя даследчыкам для вывучэння грамадскай думкі.
Рашэнне Еўракамісіі выклікала абурэнне многіх амерыканскіх палітыкаў. Віцэ-прэзідэнт ЗША Джэй Дзі Вэнс заявіў, што ЕС штрафуе X «за тое, што ён не займаецца цэнзурай» і крытыкаваў Еўропу за «атаку на амерыканскія кампаніі праз лухту».
Дзяржаўны сакратар ЗША Марка Рубіа назваў штраф «атакай замежных урадаў не толькі на Х, але і на ўсе амерыканскія платформы і амерыканскі народ».
Сам Ілан Маск заявіў, што ЕС трэба распусціць і вярнуць суверэнітэт асобным краінам, каб урады лепш прадстаўлялі людзей. На гэта польскі міністр замежных спраў Радаслаў Сікорскі адказаў мільярдэру: «Ідзі на Марс. Там не цэнзуруюць нацысцкае прывітанне», намякнуўшы на жэст Маска падчас інаўгурацыі Дональда Трампа сёлета ў студзені.
Міністр культуры выцягнуў у эфір чарговага Астапа Бэндара. І гэта стала апошняй кропляй: супраць гэтага фермера-хвалька выступіла сям’я5
Каментары