У Іспаніі затрымалі трох беларусаў, падазраваных ва ўгонах аўтамабіляў. У іх была своеасаблівая схема
У іспанскай правінцыі Алікантэ, у мястэчку Ла-Нусія каля Валенсіі, затрымалі трох грамадзян Беларусі ва ўзросце каля 44—45 гадоў. Іх падазраюць у крадзяжы аўтамабіляў, падробцы дакументаў і ўдзеле ў арганізаванай злачыннай групе. Пра гэта паведамляе мясцовае выданне Okdiario, піша сайт «Беларусь и мир».
Паліцыя пачала расследаванне пасля таго, як атрымала звесткі пра банду, якая займалася крадзяжом аўто пэўнай маркі на тэрыторыі правінцыі. Высветлілася, што машыны разбіралі недзе ў гэтым жа рэгіёне, а іх запчасткі ставілі ў так званыя «тапельцы» — аўтамабілі той жа мадэлі, што пацярпелі ад паводак пасля ўрагану «Дана» ў 2024 годзе. Пасля гэтага атрыманыя «гібрыды» прадавалі як легальныя машыны на рынку б/у ў іншых краінах.
Калі следчыя акрэслілі трох падазраваных, яны арганізавалі за імі негалоснае назіранне. Гэта прывяло да дома ў раёне вілаў у Ла-Нусіі, дзе і была абсталяваная майстэрня.
Высветлілася, што схема выглядала так: злачынцы куплялі ў прыватных асоб за наяўныя «ўтопленыя» аўто сярэдняга і прэміяльнага класа, пасля знаходзілі на вуліцы такую ж мадэль, уганялі яе, некаторы час трымалі ў пэўным месцы, а потым прывозілі дадому і цалкам разбіралі. Дэталі з угнанага аўтамабіля пераносілі на шасі купленага ва «ўтопленым» стане, пасля чаго гатовую машыну выводзілі на легальны рынак.
Падчас праведзеных ператрусаў знайшлі два нядаўна ўгнаныя дарагія аўто: аднаму ўжо паставілі новыя нямецкія нумары, другое яшчэ разбіралі. Таксама канфіскавалі аўтамабілі саміх трох падазраваных — выявілася, што яны таксама былі «тапельцамі» і мелі нелегальныя запчасткі.
У майстэрні паліцыя знайшла абсталяванне для ўгону: прылады для кланавання ключоў, сістэмы сачэння за аўто, якое планавалі скрасці, комплексы для перапраграмавання электронных блокаў і вялікую колькасць ключоў ды дакументаў да аўтамабіляў тых марак, якія фігуравалі ў справе.
Затрыманых даставілі ў суд, дзе ім абралі меру стрымання ў выглядзе арышту. Следства працягваецца, бо трэба прааналізаваць вялікі аб’ём дакументаў, і не выключана, што будуць новыя затрыманні.
Начальнік міліцыі Брагіна страляў у сваю жонку. Яна цудам выжыла9
Каментары
Красочка есть,МД10?