Замарозку тэрмінаў выдачы ДНЖ у Польшчы хочуць прадоўжыць да сакавіка 2027 года
Гэта вынікае з праекта закона, які павінен прыйсці на змену дзейным нормам аб дапамозе ўкраінскім уцекачам. Нягледзячы на назву, ён закранае і іншых замежнікаў, піша Most.
Справы аб ДНЖ і іншых легалізацыйных працэдурах па-ранейшаму будуць разглядацца, і рашэнні па іх працягнуць выносіць. Але дзяржаўныя органы не будуць абавязаны ўкладацца ва ўсталяваныя тэрміны. Фактычна гэта расцягвае легалізацыйныя працэдуры на неабмежаваны час. Такая практыка прымяняецца апошнія гады і стварае праблемы для многіх замежнікаў, якія жывуць у Польшчы. Пры гэтым праз замарозку тэрмінаў дзяржаўныя органы (ужонды) нельга прыцягнуць да адказнасці за затрымку разгляду спраў.
Пасля пачатку вайны ва Украіне ў Польшчы быў распрацаваны закон аб падтрымцы ўцекачоў. Затым падобныя дакументы прымаліся кожныя паўгода, працягваючы асноўныя пункты першапачатковай нормы. Адна з мер — замарозка тэрмінаў разгляду спраў аб ДНЖ — закранала не толькі ўкраінцаў, а ўсіх замежнікаў. Гэта тлумачылася вялікай нагрузкай на дзяржаўныя органы з-за плыні ўкраінскіх грамадзян.
Апошні раз закон аб уцекачах быў падпісаны ў верасні 2025 года, і яго палажэнні ахопліваюць перыяд да 4 сакавіка 2026 года. Ужо ў верасні закон прымалі са складанасцю: прэзідэнт пагадзіўся падпісаць толькі другую, змененую версію. І тады Караль Наўроцкі папярэджваў, што далей закон падаўжаць не будуць. Многія спадзяваліся, што, адпаведна, пасля 4 сакавіка 2026 года тэрміны разгляду спраў аб ДНЖ будуць «размарожаныя».
Зараз урад працуе над тым, як будуць адмененыя пункты закона аб дапамозе ўкраінскім уцекачам. Гэта будзе апісана ў адпаведным законапраекце. На сайце канцылярыі прэм’ер-міністра прыведзены асноўныя палажэнні новага дакумента.
З іх вынікае, што тэрміны спраў, звязаныя з пражываннем замежнікаў, хочуць прыпыніць да 4 сакавіка 2027 года, то бок яшчэ на год.
Але адначасова ў апублікаванай інфармацыі прыводзіцца пункт аб прадаўжэнні тэрмінаў дзеяння дазволаў і іншых дакументаў да той жа даты — 4 сакавіка 2027 года. Як будзе рэалізавана гэтая мера, пакуль складана ацаніць. Але калі практыка будзе такая ж, як падчас эпідэміі COVID, гэта будзе азначаць прадаўжэнне легальнага статусу замежнікаў, нават калі тэрмін дзеяння іх ДНЖ скончыцца.
Цяпер чытаюць
«Больш за 10 чалавек выехалі ў Еўропу — і гэта толькі з майго аддзялення». Рэаніматолаг з райцэнтра шчыра апісаў будні беларускай медыцыны17
Каментары