Муляра з Жодзіна асудзілі па справе Гаюна і за «абразу» Лукашэнкі
Ігар Нейман шмат гадоў займаўся будаўніцтвам дамоў, а ў вольны час корпаўся ў машынах. Нядаўна яго асудзілі па двух палітычных артыкулах.
Ігару Нейману 39 гадоў. Ён жыве ў Жодзіне. Доўгі час мужчына працаваў у сферы прыватнага будаўніцтва: разам з камандай узводзіў катэджы ў родным горадзе, а таксама ў Мінску і Барысаве. Пасля ён сам працаваў мулярам, клаў і блокі, і цэглу.
Асобным захапленнем Ігара былі аўтамабілі. У яго раней быў старэнькі аўтамабіль Renault 11, які ён цюнінгаваў і рамантаваў сам ды раіўся з экспертамі на форумах пра асаблівасці гэтага аўто.
Нядаўна Мінскі абласны суд вынес мужчыну прысуд паводле частак 1 і 2 артыкула 361‑4 (садзейнічанне экстрэмісцкай дзейнасці), а таксама па частцы 1 артыкула 368 КК (абраза Лукашэнкі). Пераслед па артыкуле 361-4, хутчэй за ўсё, звязаны са справай Гаюна.
Ігару прысудзілі хатнюю хімію. Дакладны тэрмін і акалічнасці затрымання пакуль невядомыя.
***
«Беларускі Гаюн» — маніторынгавы OSINT-праект, які быў створаны ў 2022 годзе, калі Расія праз Беларусь напала на Украіну. Праект адсочваў ваенную актыўнасць расійскіх і беларускіх войскаў, абапіраючыся на інфармацыю ад беларусаў. Каардынавала яго дзейнасць група актывістаў на чале з Антонам Матолькам.
Справа Гаюна пачалася пасля таго, як сілавікі затрымалі актывістку, якая некалькі гадоў жыла ў Беларусі ў падполлі. У яе мабільніку знайшлі спасылку на далучэнне ў бот Гаюна, якую ёй дасылалі ў самым пачатку існавання праекта. Фатальная памылка была ў тым, што спасылка была бестэрміновая. А таму сілавікі змаглі падключыцца да бота і выпампаваць адтуль усю інфармацыю. Яны атрымалі паведамленні акаўнтаў, якія пісалі ў бот, а таксама іхнія ID і імёны карыстальнікаў.
Заснавальнік Гаюна Антон Матолька адразу пасля ўзлому патлумачыў, як адбыўся выцек інфармацыі і абвясціў пра закрыццё праекта.
«Наша Нiва» — бастыён беларушчыны
ПАДТРЫМАЦЬ
«Жэня пагадзіўся на будоўлю, а не ваяваць. І толькі калі выйдзе з запою!»: як прадалі ў расійскую армію жыхара Лёзна. Ахвяра не адна6
Каментары