«Ён да гэтага часу прыходзіць у сябе пасля ўдару ў сківіцу». Трамп высмяяў Макрона і яго жонку на фоне новай атакі на НАТА
Дональд Трамп публічна прайшоўся па Эмануэлю Макроне і яго жонцы Брыжыт Макрон падчас прыватнага абеду, які адбыўся напярэдадні.
«Я тэлефаную ў Францыю, Макрону, з якім яго жонка абыходзіцца жудасна. Ён да гэтага часу спрабуе акрыяць пасля ўдару ў сківіцу», — цытуюць амерыканскага прэзідэнта Reuters і Le Monde.
Гаворка ішла пра відэа 2025 года з В’етнама, якое Макрон пазней называў часткай дэзінфармацыйнай кампаніі.
Тады падчас спуску па трапе камера зафіксавала нечаканы момант паміж Эмануэлем Макронам і яго жонкай. Брыжыт Макрон рэзка дакранулася да твару прэзідэнта Францыі Эмануэля Макрона на борце самалёта, які прызямліўся ў аэрапорце Ханоя 25 мая.
Жэст першай лэдзі, што выклікаў розныя інтэрпрэтацыі, імгненна распаўсюдзіўся ў сацсетках і стаў аб’ектам спекуляцый.
Запіс са словамі Трампа ненадоўга з’явіўся на YouTube-канале Белага дома, пасля чаго доступ да яго быў закрыты.
Далей Трамп звязаў насмешкі над Макронам з прэтэнзіямі да саюзнікаў па альянсе, піша Bild.
Паводле Reuters і AP, ён зноў назваў НАТА «папяровым тыграм» і заявіў, што сур’ёзна разглядае выхад ЗША з альянсу пасля адмовы еўрапейскіх краін падтрымліваць амерыканскую кампанію супраць Ірана. Дзяржаўны сакратар Марко Рубіа таксама казаў, што пасля вайны Вашынгтону прыйдзецца перагледзець стаўленне да НАТА.
У Еўропе гэтыя заявы ўжо выклікалі трывогу. AP паведамляе, што генсек НАТА Марк Рутэ збіраецца ў Вашынгтон, каб паспрабаваць знізіць напружанасць у адносінах з ЗША.
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося2
Каментары
[Зрэдагавана]