Расійскі «АўтаВАЗ» прыпыніць вытворчасць пасля падзення продажаў сваіх машын Lada
Расійскі аўтавытворца АўтаВАЗ плануе часова спыніць вытворчасць гэтай вясной. Супрацоўнікаў адправяць у карпаратыўны адпачынак з 4 да 13 мая, а з улікам традыцыйных у Расіі вялікіх выхадных канвеер фактычна спыніцца ўжо з 2 мая, піша The Moscow Times.
Афіцыйна кампанія тлумачыць спыненне выпуску прадукцыі мадэрнізацыяй вытворчасці і падрыхтоўкай да выпуску новай мадэлі — красовера Lada Azimut. Таксама будуць праводзіцца работы на лініі, дзе выпускаюць пазадарожнік Lada Niva.
Аднак дылеры сцвярджаюць, што сапраўдная прычына — нізкі попыт і перапоўненыя склады. Паводле пэўных звестак, прастой можа працягнуцца нават да сярэдзіны мая. Такім чынам кампанія спрабуе пазбегнуць пераходу на скарочаны працоўны тыдзень, як гэта ўжо зрабіў КамАЗ праз падзенне продажаў.
Хоць у сакавіку аўтарынак у Расіі крыху ажывіўся, марка Lada паказала слабейшыя вынікі за іншых. Яе продажы амаль не выраслі ў параўнанні з мінулым годам, а за першы квартал нават знізіліся. У той жа час канкурэнты, асабліва кітайскія брэнды, значна нарошчваюць продажы.
Эксперты адзначаюць, што попыт у сакавіку часткова вырас з-за ранняй вясны і жадання пакупнікоў паспець купіць аўто па старых цэнах. Але ў цэлым прагнозы стрыманыя — чакаецца, што ў наступныя месяцы рынак зноў аслабне.
Асноўная праблема «АўтаВАЗа» ў тым, што ягоныя новыя мадэлі становяцца даражэйшымі і ўжо канкуруюць з больш сучаснымі кітайскімі аўтамабілямі. У выніку частка пакупнікоў аддае перавагу альбо замежным брэндам, альбо патрыманым аўто.
Нягледзячы на тое, што доля аўтамабіляў расійскай зборкі на расійскім рынку істотна вырасла, асноўную выгаду ад гэтага атрымліваюць не мадэлі Lada, а іншыя вытворцы.
Цяпер чытаюць
«Не спадабаліся прадукты на паліцы — і пішуць туды эсэмэску». МУС назвала Threads пагрозай бяспецы і заявіла пра затрыманні21
Каментары