Аўстрыйца прысудзілі да 15 гадоў за падрыхтоўку нападу на канцэрт Тэйлар Свіфт у Вене
Тры канцэрты мусілі адбыцца ў жніўні 2024 года, але былі адмененыя.
21‑гадовы грамадзянін Аўстрыі, які прызнаў віну ў спробе арганізаваць джыхадысцкі напад на канцэрце спявачкі Тэйлар Свіфт у аўстрыйскай сталіцы ў 2024 годзе, атрымаў 15 гадоў турмы, піша Бі-бі-сі.
Мужчына, імя якога ў адпаведнасці з аўстрыйскім заканадаўствам фігуруе ў матэрыялах справы як Беран А., таксама прызнаў сваю віну ў здзяйсненні іншых злачынстваў.
У чацвер ён заявіў суду ў горадзе Вінер-Нойштат, што шкадуе аб зробленым, пасля чаго прысяжныя выйшлі на некалькі гадзін для вынясення вердыкту.
Канцэрты Тэйлар Свіфт у рамках сусветнага тура Eras павінны былі адбыцца на стадыёне «Эрнст Хапель» у Вене ў жніўні 2024 года, але былі адменены пасля таго, як аўстрыйскія ўлады атрымалі інфармацыю ад ЦРУ аб магчымым нападзе і затрымалі падазраваных.
На тры канцэрты было прададзена амаль 200 тысяч білетаў.
Па словах пракурораў, Беран А. радыкалізаваўся і прысягнуў на вернасць джыхадысцкай групоўцы «Ісламская дзяржава».
Абвінавачанне заявіла, што ён спрабаваў, але не змог незаконна набыць зброю, у тым ліку кулямёт і ручную гранату.
У сваіх паказаннях у мінулым месяцы Беран А. заявіў, што быў упэўнены ў неабходнасці «несці джыхад», але «баяўся памерці».
Ён расказаў суду, як атрымліваў інструкцыі і спрабаваў вырабіць бомбу, але пацярпеў няўдачу. А таксама пра тое, як звяртаўся па параду з нагоды выбару зброі да некалькіх чатаў і да высокапастаўленага члена ІД.
Судовы псіхіятр Петэр Хофман заявіў, што ў Берана А. не было прыкмет псіхічнага захворвання, дадаўшы, што ў яго радыкалізацыі «няма псіхіятрычнага тлумачэння».
Падчас абвяшчэння прысуду Беран А. час ад часу аглядаў залу суда, гучна ўсхліпваючы, а яго ногі і рукі дрыжалі.
Разам з Беранам А. перад судом паўстаў яшчэ адзін 21‑гадовы мужчына са Славакіі па імені Арда К. Ён не быў датычны да змовы супраць Тэйлар Свіфт, але разам яны праходзілі па абвінавачанні ў дачыненні да ячэйкі джыхадысцкай групоўкі «Ісламская дзяржава». Ён быў прысуджаны да 12 гадоў пазбаўлення волі.
Абодва прысуды яшчэ могуць быць абскарджаныя. У сваіх заключных словах падсудныя папрасілі прабачэння.
«Я проста хачу сказаць, што мне вельмі шкада», — заявіў у судзе Беран А.
Каментары
Ну, да, ну, да.